Մի անգամ գնացի շուկա, դրանից հետո արգելեցին գնալ. Նարեկ Սարգսյան

Քաղաքաշինության նախարար Նարեկ Սարգսյանը Yerkir.am-ի հետ զրույցում ամբողջ աշխարհին խաղաղություն ու անհոգություն մաղթեց, բայց անկեղծորեն խոստովանեց, որ Ամանորի տոներն իր համար չեն: «Ես էդ թեմաներում չկամ»,- ասաց նախարարը: Նա, ի մի բերելով 2015 թվականը, նշեց, որ քաղաքաշինության ոլորտում առկա հիմնարար խնդիրներն իր տեսադաշտում է պահել, և բազմաթիվ քայլեր են արվել, որոնք տեսանելի կդառնան առաջիկա տարում: «Ես ուզում եմ, որ խաղաղություն լինի և շատ-շատ շինարարություններ նախագծվեն ու կյանքի կոչվեն: Եթե ամենուրեք լինի շինարարություն, տրամադրության փոփոխությունն ապահովված կլինի»,- ասաց Սարգսյանը

: Նա կատակեց, որ իրեն տանը «սև ցուցակ»-ում են պահում տարիներ շարունակ: «Ես կենցաղում չկամ, և մեր ընտանիքն էլ ստանդարտ չէ: Հիշում եմ` մի անգամ շուկա գնացի ու դրանից հետո ինձ արգելեցին շուկա գնալ: Գնացի, տեսա թթու վաճառող մալական աղջիկներին ու շատ ուրախ էի, որ Հայաստանից չէին գնացել: Միշտ սիրում եմ, որ բազմազգ լինի, ու լիքը թթու գնեցի, բոլորից գնեցի: Երբ եկա տուն, հասկացան, որ ինձ չի կարելի շուկա ուղարկել: Դա առաջին ու վերջին անգամ էր»,- անկեղծացավ նախարարը:

Նա պատմեց, որ Ամանորի տոնակատարությունների օրերին իր համար տարբեր զբաղմունքներ է ստեղծում: «Կարգավորում եմ իմ գրադարանը, մենակ եմ մնում. որևէ մեկը քեզ չի հիշում, հանգիստ կարող ես կարդալ և դասավորել գրադարանդ, նախագծերն ուսումնասիրել: Աշխատանքային այս ռեժիմի մեջ անընդհատ ցայտնոտի մեջ ես, այնպես որ` Նոր տարին ինձ համար լավ է հատկապես այդ առումով` որ կարող եմ իմ ուզած գործով զբաղվել: Անցած տարի, օրինակ, Վահան Հովհաննիսյանի գիրքը կարդացի, որովհետև շատ ճնշված էի ինձ զգում: Նա մահից առաջ ինձ զանգահարել էր: Քանի անգամ ասել էր` ինչո՞ւ չես կարդում: Իմ հոգու պարտքն էր դա: Հենց դեկտեմբերի 28-ին նա մահացավ, ես այդ պահից մինչև հունվարի 3-4-ը կարդացի գիրքը: Հիմա մի հատ էլ այդպիսի գիրք կա` Ռուբեն Սևակի մասին, և էլի պլանավորել եմ այս օրերին կարդալ: Ես հիմնականում հենց այդպես եմ անցկացնում Ամանորը»,- ասաց նախարարը` հավելելով, որ ինքն այդ օրերին չի սիրում հյուր գնալ և միայն ծնողներին է այցելում: «Հիմնականում ասում եմ, որ ես Հայաստանում չեմ, որպեսզի այդ աժիոտաժից խուսափեմ»,- խոստովանեց նա:

Վերջում ասաց, որ թեև այլ կերպ է պատկերացնում Ամանորի գաղափարը, այդուհանդերձ, բոլորին մաղթում է լավ օրեր ու բարձր տրամադրություն: