Վաղուց սպառված գործիչներ են. Վահան Բաբայանը` «Նոր Հայաստան»-ի մասին

ԲՀԿ մամուլի խոսնակ Վահան Բաբայանն այսօր լրագրողների հետ զրույցում, խոսելով երեկ Ազատության հրապարակում «Նոր Հայաստան» ընդդիմադիր ուժերի կողմից նախաձեռնված հանրահավաքի ու նստացույցի մասին, ասաց, որ երեկվա հանրահավաքը իրականում թեստ էր, և որ իրականությունը բավական տհաճ էր հանրահավաքի կազմակերպիչների համար, քանի որ նրանք ակնկալում էին բազմամարդ հանրահավաք, որը, սակայն, չկայացավ:

«Հանրահավաքը բազմամարդ չէր, որովհետև ժողովրդի կողմից չկա այդքան աջակցություն: Եվ եթե այդ հանրահավաքի կազմակերպիչները չունեն այդքան աջակցություն ժողովրդի կողմից, ուրեմն միայն բարձր գոռալով չէ: Եվ երկրորդ` այդ` «Մահ ռեժիմին» արտահայտությունը, որ հնչեցնում են, ուրեմն պետք է դրա պատասխանատվությունն էլ գիտակցեն»,- ասաց նա:

Հարցին, թե չի՞ հավատում, որ հեղափոխությունը սկսվել է, ինչի մասին երեկ հայտարարել էր Ժիրայր Սեֆիլյանը, Վահան Բաբայանը պատասխանեց. «Իսկ դուք հավատո՞ւմ եք: Բնական է, որ չեմ հավատում: Նրանք վաղուց սպառված գործիչներ են: Ով սպառվել է, հավաքվել է, ինչ-որ մի խումբ են ստեղծել ու ուզում են ժողովրդի քվեն ստանան, բայց այդտեղ ո\'չ ընտրություններ կան, որ իրենք էլ քվե ստանան, ո\'չ էլ ինչ-որ այլ իրադարձություն: Ընդամենը սահմանադրական փոփոխություններ են: Ես ասել եմ` Րաֆֆի Հովհաննիսյանը տապալված քաղաքական գործիչ է: Ծաղկեպսակ էլ թող դնեն այնտեղ, որտեղ իրենք հարմար են գտնում»: