Ցեղասպանության 100-րդ տարելիցին նվիրված միջոցառումներ` Լիտվայի Կաունաս քաղաքում

Նոյեմբերի ընթացքում Լիտվայի Կաունաս քաղաքի Ա.Մարտինայտիսի անվան գեղարվեստական դպրոցը Կաունասի քաղաքապետարանի հովանավորությամբ և Լիտվայում ՀՀ դեսպանության աջակցությամբ կազմակերպել էր Հայոց ցեղասպանության 100-րդ տարելիցին նվիրված մի շարք միջոցառումներ` այդ թվում Հայաստանին նվիրված «Փոքր երկիր` մեծ ազգ» և «Հայոց ցեղասպանությունը համաշխարհային մամուլի առաջին էջերին» ցուցահանդեսները:

Նոյեմբերի 1-ին` Կաթոլիկ աշխարհում նշվող Բոլոր Սրբերի օրը, գեղարվեստական դպրոցում տեղի ունեցավ մոմավառության արարողություն Կաունասի արքեպիսկոպոս Սիգիտաս Տամկյավիչուսի մասնակցությամբ` ի հիշատակ Հայոց ցեղասպանության սրբադասված 1.5 միլիոն նահատակների:

Նոյեմբերի 19-ին տեղի ունեցավ եզրափակիչ միջոցառումը` «Փոքր երկիր` մեծ ազգ» խորագրով ցուցահանդես-մրցույթի մասնակիցների պարգևատրումը: Ողջույնի խոսքով հանդես եկան Լիտվայում ՀՀ դեսպան Արա Այվազյանը և Ա.Մարտինայտիսի անվան գեղարվեստական դպրոցի տնօրեն ժիգիմանտաս Շարակաուսկասը:

Երեկոյի ընթացքում ելույթ ունեցան լիտվական ազգագրական «Ռատիլելիս» անսամբլը և Կաունասի հայ համայնքի «Հայրենիք» համույթը: Վիտաուտաս Մագնուսի համալսարանի ուսանողները ընթերցեցին հատվածներ Գրիգոր Նարեկացու «Մատյան Ողբերգության» պոեմից:

Միջոցառմանը ներկա էին կրոնական կառույցների, քաղաքապետարանի, լիտվահայ համայնքի ներկայացուցիչներ, արվեստի գործիչներ, դպրոցի սաներ:

ՀՀ ԱԳՆ