2014-ի համեմատ` հացամթերքը 5,2 տոկոսով թանկացել է

ԱՊՀ երկրների ցանկում Հայաստանն այս տարվա ինը ամիսների ընթացքում բացառություն է կազմում` սպառողական զամբյուղի գները հաշվի առնելով, քանի որ ԱՊՀ բոլոր երկրներում արձանագրվել է գնաճ, իսկ Հայաստանում` 2 տոկոս գնանկում: Այս մասին այսօր լրագրողներին հայտնեց ԱՎԾ գների վիճակագրության և միջազգային համադրումների բաժնի պետ Գուրգեն Մարտիրոսյանը:

Նա նշեց, որ, օրինակ, Ուկրաինայում արձանագրվել է ամենաբարձր գնաճը` 41,4 տոկոս, իսկ ՌԴ-ում` 10,4:

Մարտիրոսյանը նշեց նաև, որ եթե համեմատենք այս տարվա հոկտեմբերի ցուցանիշները նախորդ տարվա նույն ժամանակհատվածի հետ, ապա Հայաստանում մի շարք ապրանքների գները նույնպես թանկացել են:

«Թանկացել է, օրինակ, հացամթերքը /5,2 տոկոսով/, իսկ սուրճը, թեյն ու կակաոն` 14, 2 տոկոսով: Բարձրացել է նաև հրուշակեղենի /14 տոկոս/ և ոչ ոգելից խմիչների գինը /6 տոկոսով/: Փոխարենը իջել է շաքարավազինը գինը` 2 տոկոսով»,- հայտնեց նա: