Հնարավոր է` օլիմպիական խաղերում Հայաստանն առաջին անգամ կին մարմնամարզիկ ներկայացնի

Հայաստանի մարմնամարզության հավաքականի գլխավոր մարզիչ Հակոբ Սերոբյանի խոսքով՝ մարմնամարզիկ Հուռի Գեբեշյանի գրանցած արդյունքը 99 տոկոսով հնարավորություն կտա մասնակցելու Ռիոյի օլիմպիական խաղերին: 

«Հուռին բոլորիս շատ ուրախացրեց, քանի որ  բազմամարտում հավաքեց 51, 965 միավոր: Եթե Հուռի Գեբեշյանը «Թեստ իվենթ»-ի ժամանակ, որը կայանալու է ապրիլին (Ռիո դե Ժանեյրո), կրկնի այս արդյունքը, ապա մենք կունենանք պատմության մեջ առաջին կին մարմնամարզիկը, ով կներկայացնի Հայաստանը օլիմպիական խաղերում։ Ինչ վերաբերում է տղաներին և մասնավորապես` Արթուրին, ամեն ինչ լավ է, հույս ունենք` այսօր էլ ուրախանանք մեր մարզիկների հաջողությամբ»,- ՀԱՕԿ լրատվականի լրագրողի հետ զրույցում ասել է  Սերոբյանը: 

Հոկտեմբերի 23-ից նոյեմբերի 1-ը Շոտլանդիայի մայրաքաղաք Գլազգոյում անցկացվում է մարմնամարզության աշխարհի առաջնությունը, որը վարկանիշային է 2016 թվականի Օլիմպիական խաղերի համար: Հայաստանը ներկայացնում են Վահագն Դավթյանը, Հարություն Մերդինյանը, Արթուր Դավթյանը և Հուռի Գեբեշյանը: Հայաստանի հավաքականը Գլազգո է մեկնել հոկտեմբերի 17-ին: