Մենք չենք կարողանա 2016 թվականի բյուջեն ամբողջությամբ կատարել. Վարդան Բոստանջյան

Բոլոր պարագաներում 2015 թիվը հնարավոր չէ դիտարկել դրական քողի ներքո. այսօր լրագրողներին ասաց տնտեսագիտության դոկտոր Վարդան Բոստանջյանը` անդրադառնալով հայաստանյան տնտեսական վիճակին:

«Աշխարհաքաղաքական տարբեր զարգացումները բավականին շատ են, և դրանք ունեն իրենց էական ազդեցությունը Հայաստանի վրա: Նաև նշենք, որ մենք աշխարհագրորեն բարդ տարածաշրջանում ենք գտնվում, դրան գումարած` երկիրը հարուստ չէ ստրատեգիական ռեսուրսներով: 2015 թվականն արդեն իսկ դժվար տարի է եղել»,- ասաց Բոստանջյանը:

Ըստ նրա` մասնավոր գնահատականներն ասում են, որ մենք չենք կարողանա 2016 թվականի բյուջեն ամբողջությամբ կատարել:

«8,6 միլիարդ դրամի չափով ավելի զուսպ պլանավորում ունենք, սա կառավարության կողմից ավելի զուսպ մոտեցում է: Մենք կունենանք դժվարություններավելի մեծ եկամուտներ ունենալու դեպքում»,- ասաց տնտեսագետը` հավելելով, որ կառավարման տեսանկյունից դեռևս խոցելիություն ունենք: «Արտաքին ազդակներով պայմանավորված` բացասական զարգացումներ կան, սակայն կարծում եմ, որ սեկվեստորի աստիճանի մենք չենք հասնի»:

Բոստանջյանի կարծիքով`Իրանի հետ համագործակցությունը Հայաստանի համար շատ ողջունելի կլինի: «Այս պահի դրությամբ` ԵՏՄ-ն չի գործում` որպես այդիսին: Կարգավորման տարբեր հարցեր կան, որոնց մենք դեռ չենք հասել: Մենք իրավունք չունենք կանխավ ասելու, որ ԵՏՄ-ի հետ հարաբերություններն առ ոչինչ են: 170 միլիոնանոց շուկա կա, ի վերջո: Ցանկացած տնտեսվարողի համար շուկա մտնելը շատ դժվար գործ է»,- նշեց նա:

Տնտեսագետի կարծիքով` քաղաքական ճնշումների պայմաններում մենք հայտնվեցինք ԵՏՄ-ում, բայց ԵՄ-ն հասկացավ, որ դրան բացասական նայել պետք չէ: «Եվրոպական տարբեր կազմակերպություններից գալիս են մեսիջներ, որ մենք կարող ենք հարաբերություններ ունենալ նաև նրանց հետ»,- ասաց Բոստանջյանը:

Նա նշեց նաև, որ միայն գյուղատնտեսության ոլորտում եղավ աճ, ինչն ուղղակիորեն պայմանավորված էր եղանակային, բնական պայմաններով: