Մենք պետք է սովորենք չներել հակառակորդին. Արկադի Տեր-Թադևոսյան

Ադրբեջանն անում է ամեն ինչ՝ լարվածությունը մեծացնելու համար. այսօր լրագրողների հետ զրույցում ասաց Արցախյան ազատամարտի հերոս, գեներալ-մայոր Արկադի Տեր-Թադևոսյանը` Կոմանդոսը:

Նա, սակայն, համոզված է` 95 տոկոսով պատերազմ չի լինի, մնացած 5 տոկոսը արկածախնդրություն է, սադրանք: «Ադրբեջանն ուզում է ցույց տալ, որ ինքը հարուստ է և ուժեղ և, որ հարձակվելով Արցախի վրա, կարող է հաղթել, բայց դա չի համապատասխանում իրականությանը»,- ասաց Կոմանդոսը:

Խոսելով վերջին դեպքի մասին, երբ Ադրբեջանը հրետակոծել էր զորամասը, Արկադի Տեր-Թադևոյանը նշեց. «Ո՞նց Գուրգենին սպանեցին կացնով, դա էլ էր հարված զորամասին, ուր զինվորները հաց էին ուտում: Ուրեմն մենք պետք է սովորենք չներել»:

Նա նաև կարծիք հայտնեց, որ Ադրբեջանն ինքնուրույն չէր կարող գնալ նման ագրեսիայի, ըստ երևույթին` դրա հետևում կանգնած է Թուրքիան: