Արմենչիկի դեպքում պարգևը գտավ իր արժանի հերոսին. Ռուբեն Բաբայան

Տիկնիկային թատրոնի տնօրեն Ռուբեն Բաբայանն այսօր լրագրողների հետ զրույցում անդրադարձավ տարբեր կոչումների հանձնման ինստիտուտին: Այս համատեքստում նա մասնավորապես խոսեց սեպտեմբերի 21-ին երգիչ Արմենչիկին վաստակավոր արտիստի կոչման շնորհմանը: Բաբայանի կարծիքով` կոչումների հանձնման ինստիտուտն իրեն սպառել է և անիմաստ բնույթ է կրում: Ըստ նրա` կոչումը ենթադրում է որոշակի գնահատական, ավելի կոնկրետ` մասնագիտական, սակայն հայտնի է, որ այդ կոչումները տվողները մասնագետներ չեն:

«Կոչումներ հանձնելն ավելի շատ ընդունված է բռնապետական երկրներում, իսկ Հայաստանում դա եկել է խորհրդային հասարակարգից: Ես կարծում եմ, որ նմանօրինակ կոչումներ հանձնելը էժանագին քայլ է` մարդկանց համակրանքը վայելելու համար: Կոչումն ինքնին անիմաստ է: Արմենչիկի դեպքում էլ ասեմ, որ պարգևը գտավ իր արժանի հերոսին: Նրան կոչում տվողը լսում է հենց այդպիսի երգեր»,- ասաց Բաբայանը և հավելեց, որ Արմենչիկը միակ մարդն է, ով իմաստավորում է Մարզահամերգային համալիրի գոյությունը:

Ռեժիսորի կարծիքով` Արմենչիկին կարելի էր տալ նաև ժողովրդական արտիստի կոչում, դրանք համարյա նույն բաներն են: «2004 թվականից ես էլ ունեմ վաստակավոր արտիստի կոչում, որի մասին տեղեկացել եմ հեռուստացույցից: Ես այնքան չեմ արժևորում կոչումների ինստիտուտը, որ նույնիսկ չեմ էլ հրաժարվում իմ կոչումից»,- ասաց Բաբայանը: