«Գյումրու ֆուտբոլային ակադեմիա» ներդրումային ծրագիրը կխթանի հայկական ֆուտբոլի զարգացումը

Կառավարության վաղվա նիստի օրակարգում ներառված է որոշում «Գյումրու ֆուտբոլային ակադեմիա» ներդրումային ծրագրին հավանություն տալու մասին:

Գյումրիում ֆուտբոլի ակադեմիայի կառուցման ծրագիրը Հայաստանի ֆուտբոլի ֆեդերացիայի և երկու միջազգային կազմակերպությունների՝ Ֆուտբոլի համաշխարհային միության՝ ՖԻՖԱ-ի և Ֆուտբոլի եվրոպական միության՝ ՈւԵՖԱ-ի կողմից իրականացվող համատեղ ներդրումային ծրագիր է: Այն ներառված է Հայաստանի ֆուտբոլի ֆեդերացիայի «Հայկական Ֆուտբոլի ստրատեգիական զարգացման ծրագրի» շրջանակներում:

Գյումրիի ֆուտբոլի ակադեմիան ներառում է 8 հեկտար հողատարածք, որը Գյումրու քաղաքապետի 11.05.2009թ. թիվ 908-Ա որոշմամբ հատկացվել է Հայաստանի ֆուտբոլի ֆեդերացիային:

Գյումրիի ֆուտբոլի ակադեմիայում կկարողանան մարզվել մինչև 1000 պատանիներ և աղջիկներ: Ակադեմիայում տեղի մասնագետների համար կկազմակերպվեն մարզչական կրթական դասընթացներ, որի արդյունքում վերապատրաստված և համապատասխան արտոնագրեր ստացած մարզիչներն  իրավունք կստանան աշխատելու հայկական ֆուտբոլում: