Օսիպյանը և ցուցարարները վիճեցին

Երևանի փոխոստիկանապետ Վալերի Օսիպյանը մոտեցավ Բաղրամյան պողոտայում գտնվող ցուցարարներին և հորդորեց դադարեցնել աղմուկը և հասարակական կարգի խախտումը: Օսիպյանը նշեց, որ տարածքում կան բազմաբնակարան շենքեր, և աղմուկը խաթարում է շենքերի բնակիչների հանգիստը: Փոխոստիկանապետը նշեց՝ զգացվում է, որ այս հավաքը չունի կազմակերպիչներ և անօրինական է:

Ցուցարարներից մեկի դիտարկմանը, թե ժողովուրդը 23:00-ին սպասում էր ոստիկանության հայտարարությանը, մինչդեռ նրանք որևէ բան չհայտարարեցին, Օսիպյանը պատասխանեց, որ ոստիկանությունը հայտարարել է, որ այս հավաքն անօրինական է:

Ցուցարարներից  մեկը Օսիպյանին  մեղադրեց սադրանք կազմակերպելու մեջ, իսկ Օսիպյանն էլ բարկացած պատասխանեց, որ  սադրանք բառը ցուցարարներից ոմանք իրենց պետք է պահեն: Ցուցարարը նշեց  նաև, որ իրենց մեջ սադրիչներ չկան, իսկ ովքեր էլ հայտնվում են, նրանք ուղարկված են: Ցուցարարների և Օսիպյանի միջև խոսակցությունները վերածվեցին փոխադարձ վիրավորանքների և վիճաբանության: