Զարուհի Փոստանջյանն ու Ռուբեն Հակոբյանը վիճեցին

Այսօր ԱԺ` կառավարության նախաձեռնած արտահերթ նիստում քննարկվում է ՀՀ նախագահի ներկայացրած` ՀՀ կառավարության և ՌԴ կառավարության միջև կնքված` ՀՀ կառավարությանը 200 միլիոն դոլարի չափով պետական արտահանման վարկ տրամադրելու մասին համաձայնագրի վավերացման հարցը: 

Ելույթ ունեցավ «Ժառանգություն» խմբակցության ղեկավար Ռուբեն Հակոբյանը: Նա նախ նշեց, որ իրենց խմբակցության ներսում համաձայնագրի վերաբերյալ կան տարբեր կարծիքներ, և խմբակցության անդամները ազատ են լինելու իրենց քվեարկության մեջ: «Ես այս դեպքում կներկայացնեմ իմ անձնական կարծիքը»,- ասաց նա: 

Այդ պահին Զարուհի Փոստանջյանը տեղից ասաց, թե Հակոբյանը իրավունք չունի իր տեսակետը հայտնելու, նա պարտավոր է հայտնել խմբակցության տեսակետը:

«Շնորհակալություն խորհրդի համար, Դուք շատ բարի եք»,- արձագանքեց Ռուբեն Հակոբյանը:

ԱԺ նախագահ Գալուստ Սահակյանն էլ ասաց. «Տիկի\'ն Փոստանջյան, բոլորին դիտողություն եք անում` յուրայինին, մյուսին... Մի\' բռնացեք մարդկանց տեսակետի վրա»:

Սակայն Զարուհի Փոստանջյանը շարունակեց տեղից դիտողություններ անել Ռուբեն Հակոբյանին:

«Լավ, հասկացանք… Մի քիչ… Վերջ…»,- ասաց Ռուբեն Հակոբյանը:

Նշենք, որ Զարուհի Փոստանջյանը դեմ է համաձայնագրին, իսկ Ռուբեն Հակոբյանը՝ կողմ: