Մեկնարկեց Փայլակ Հայրապետյանի դեմ նախկին վարչապետի հայցի քննությունը

Արաբկիր և Քանաքեռ-Զեյթուն վարչական շրջանների ընդհանուր իրավասության դատարանում այսօր մեկնարկեց ՀՀ նախկին վարչապետ Տիգրան Սարգսյանի` գործարար Փայլակ Հայրապետյանի դեմ հայցի քննությունը:

Դատական նիստի մեկնարկին նախագահող դատավոր Զարուհի Նախշքարյանը, առանց հիմնավորման, արգելեց դահլիճում տեսանկարահանում և լուսանկարահանում իրականացնելը՝ մինչեւ չթույլատրի:

Դատարան չէր ներկայացել երրորդ անձ ճանաչված Գագիկ Շամշյանը. նրան ուղարկված ծանուցման ծրարը վերադարձվել էր դատարան:

Հայցվոր Տիգրան Սարգսյանի ներկայացուցիչ Արամ Օրբելյանն ասաց, որ առանց երրորդ անձի կարող են շարունակել դատական նիստը: Նա նշեց նաև, որ կփորձեն ճշտել որևէ այլընտրանքային հասցե, որով կկարողանան ծանուցել նրան:

Փայլակ Հայրապետյանի ներկայացուցիչ Գրիշա Բալասանյանը միջնորդեց հետաձգել դատական նիստը՝ նշելով, որ երրորդ անձի մասնակցությունը շատ կարևոր է այս գործում. վիճարկվում է հարցազրույցը, որը հրապարակվել է հենց այդ լրատվամիջոցում:

Դատարանը համարեց, որ այս պահին նախնական քննություն չի կարող իրականանալ և հաջորդ դատական նիստը նշանակեց հուլիսի 15-ին: