Սփյուռքահայերն էլ են գտնում, որ հայկական բանկերում պետք է գումար պահել. Հրանուշ Հակոբյան

Այսօր լրագրողները Սփյուռքի նախարար Հրանուշ Հակոբյանից հետաքրքրվեցին, թե ինչ վիճակ է տիրում Հալեպում, ուր հրթիռակոծվում են հայկական թաղամասերը: Հրանուշ Հակոբյանը նշեց, որ ամեն օր տեղեկություններ են ստանում այնտեղից` իրավիճակը դեռ ծանր է:

«Մեր արտաքին գործերի նախարարն այնտեղ է, շատերը ցանկանում են դուրս գալ այնտեղից»,- ասաց նախարարը:

Լրագրողները հիշեցրեցին նախարարին իր այն հայտարարության մասին, որ սփյուռքահայերը կարող են 1000-ական դոլար պահել հայկական բանկերում, և հարցրեցին` կա՞ նման երևույթ:

Հրանուշ Հակոբյանը նշեց, որ կա մեծ շարժ այդ ուղղությամբ: «Սփյուռքից կան նամակներ, կան արտասահմանյան թերթերում հրապարակումներ, որտեղ սփյուռքահայերը նույն կոչն են անում, որովհետև իրենք էլ գտնում են, որ նման երևույթ պետք է լինի: Սփյուռքի հիմնական խնդիրն է, որ հայաստանյան իրականությունն իրենց ներկայացվի: Իսկ հայաստանյան իրականությունն այն է, որ մեր բանկերը 6-ից 18 տոկոս գումար են հատկացնում, ես էլ պարտավոր եմ դրա մասին տեղեկացնել Սփյուռքին»,- ասաց նախարարը: