Փոխարժեքներ
26 10 2024
|
||
---|---|---|
USD | ⚊ | $ 387.25 |
EUR | ⚊ | € 419.2 |
RUB | ⚊ | ₽ 4.01 |
GBP | ⚊ | £ 502.92 |
GEL | ⚊ | ₾ 141.79 |
Այսօր` կառավարության հետ հարցուպատասխանի ժամանակ, ԱԺ ՀՅԴ խմբակցության պատգամավոր Արծվիկ Մինասյանը հարց ուղղեց կառավարությանը: Նա նշեց, որ պետական կառավարման մարմինների նկատմամբ հանրության վստահության վերականգնումը կախված է կառավարության գործառույթների լիարժեք իրականացումից: Սակայն, պատգամավորի խոսքով, այն, ինչ տեսնում ենք խորհրդարանում, զարմանք է հարուցում, քանի որ նախարարներից շատերը չեն գալիս հանձնաժողովների նիստերին:
Արծվիկ Մինասյանը նշեց, որ խոսքը մասնագիտական քննարկումներին չի վերաբերում, այլ այն բանին, որ այդ նիստերի ընթացքում կայացվում են քաղաքական որոշումներ, իսկ նախարարները պետք է մասնակցեն դրանց:
«Ստեղծվել է «Նաիրիտ»-ի հարցերով հանձնաժողով, բայց զրոյական քննարկումներ են տեղի ունենում կառավարության ու խորհրդարանի միջև: Օրենքով պարտադրվում է, որ յուրաքանչյուր օրենքի նախագիծ ԱԺ գալուց առաջ պետք է ունենա ազդեցության գնահատական, և երբ ուշադրություն ենք դարձնում, տեսնում ենք, որ այդ ազդեցության գնահատականները կա'մ ձևական են, կա'մ, որ հաճախ է պատահում, չկա ազդեցության գնահատման վերաբերյալ փաստաթուղթ: Հարգարժա'ն վարչապետ, Դուք բազմիցս նշել եք Ազգային ժողովի դերակատարման բարձրացման մասին, Դուք` որպես Ձեր խոսքի տեր անձնավորություն, ի՞նչ եղավ, ինչո՞ւ հետևողական չեք»,- հարցրեց Արծվիկ Մինասյանը:
Վարչապետ Հովիկ Աբրահամյանը ընդունեց Արծվիկ Մինասյանի առաջարկը` ասելով, որ դեմ է, որ որևէ նախարար իր պարտականությունները չկատարի: Եվ եթե նախարարը պարտավոր է ներկայանալ հանձնաժողովի նիստերին, ուրեմն պետք է ներկա լինի, սակայն որոշ դեպքերում նախարարները չեն ներկայացել, որովհետև գործուղման են եղել: «Ես հետամուտ կլինեմ, որ նախարարները ներկայանան, դա կարևոր է, նախարարն իրավունք չունի չհարգելու օրենքը` չներկայանալով հանձնաժողովի նիստերին կամ լիագումար նիստին»,- ասաց Հովիկ Աբրահամյանը:
Նա հավելեց, որ հետամուտ կլինի նաև ազդեցության գնահատականի վերաբերյալ հարցի կարգավորմանը:
Ինչ վերաբերում է «Նաիրիտ»-ի հարցին, վարչապետը նշեց, որ խնդիրը շատ խորն է ու բազմաբնույթ, հիմա փորձում են տալ լուծումներ այդ խնդրին, կա նախագահի հանձնարարականը: «Մինչև հունիսի սկիզբը կոնկրետ առաջարկներ կլինեն` գործարանի վերագործարկման հետ կապված, իսկ ինչ վերաբերում է պարտքերին, ապա հաստատում եմ Երվանդ Զախարյանի ասածը, որ ամեն ինչ անելու ենք, որ մինչև 2015թ. վերջը մարենք պարտքերը»,- ասաց Հովիկ Աբրահամյանը: