Կհանդիպենք Սահմանադրական դատարանում. Արծվիկ Մինասյանը` վարչապետին

Այսօր ԱԺ արտահերթ նիստում քվեարկության դրվեց «Կուտակային կենսաթոշակների մասին» ՀՀ օրենքում լրացումներ և փոփոխություններ կատարելու հարցը:

Կողմ քվեարկեց 70, դեմ` 42 պատգամավոր, ձեռնպահ էր մեկը:

Մինչ քվեարկությունը ԱԺ ՀՅԴ պատգամավոր Արծվիկ Մինասյանը, խոսելով կուտակային կենսաթոշակային համակարգի մասին, դիմեց վարչապետին` ասելով. «Մենք փորձ արեցինք այս դահլիճում քննարկում կազմակերպել կուտակային կենսաթոշակային համակարգի վերաբերյալ, լսել հիմնավորումներ, բայց դուք դա մերժեցիք: Հիմա հայտարարում եք բաներ, որոնք, իմ խորին համոզմամբ, թե' մասնագիտական, թե' հանրային ընկալմամբ, իրականության հետ քիչ առնչություն ունեն»:

Պատգամավորը նշեց, որ կառավարության հետ կհանդիպեն Սահմանադրական դատարանում` քննարկելու բոլոր այն հարցերը, որոնք բարձրացրել են կուտակային կենսաթոշակային համակարգի դեմ բողոքող քաղաքացիները, հարցեր, որոնց լուծումները այս համակարգը չի տալիս: Արծվիկ Մինասյանը հույս հայտնեց, որ Սահմանադրական դատարանը իր որոշումով կկասեցնի կուտակային կենսաթոշակային համակարգով առաջարկվող փոփոխությունները, որովհետև դա հանգեցնելու է արտագաղթի նոր ալիքի և ազգային համակարգի լուրջ սպառնալիքի:

ՀՀ աշխատանքի և սոցիալական հարցերի նախարար Արտեմ Ասատրյանը արձագանքեց, որ այդ ռեֆորմի արդյունքները տեսանելի կլինեն: «Մենք երկար ճանապարհ ունենք անցնելու»,- ասաց նախարարը: