Հայաստանն ազատ խոսքի և ազատ մամուլի երկիր է. Գալուստ Սահակյան

Այսօր ԱԺ-ում ընթանում է երկօրյա խորհրդաժողով՝ ԵԽԽՎ իրավական հարցերի ու մարդու իրավունքների հանձնաժողովում: Խորհրդաժողովում բացման ելույթով հանդես եկավ ԱԺ նախագահ Գալուստ Սահակյանը:

«Հայաստանը Եվրոպական Միության քաղաքականության անբաժանելի մասն է կազմում ինչպես իր անցյալով, այնպես էլ` իր ներկայով: Մեր համատեղ ջանքերի արդյունքը տեսանելի է և զգալի առաջընթաց է արձանագրվել Հայաստանի սոցիալական զարգացման, պետական կառույցների ամրապանդման, կոռուպցիայի դեմ պայքարի, դատական համակարգի բարելավման ոլորտում: Հայաստանը ազատ խոսքի և ազատ մամուլի երկիր է, որտեղ մարդիկ կարող են ազատ արտահայտվել»,- ասաց ԱԺ նախագահը:

Նրա խոսքով՝ Հայաստանն ունի կայացած քաղաքացիական հասարակություն, որը կարող է բարձրացնել իր ձայնը ցանկացած հարցի շուրջ:

«Կարևոր եմ համարում անդրադառնալ Եվրոպական խորհրդի առաջ ծառացած այնպիսի խնդրի, որն է անհանդուրժողականությունը: Այն ծնում է ռասիզմ, բռնություն, որը, ի վերջո, վերածվում է հակամարտությունների: Հայ ժողովուրդն իր վրա է զգացել, թե ինչ կարող է բերել այլատյացությունը, հենց դրա հետևանքով հայ ժողովուրդը իր վրա զգաց քսաներորդ դարի առաջին ցեղասպանությունը»,- ասաց Սահակյանը և հավելեց, որ ԵՄ-ի և Հայաստանի ընդհանուր նպատակը պետք է լինի տարբեր ժողովուրդների միջեւ միասնականություն հաստատելը:

ԱԺ նախագահն իր ելույթում նաև անդրադարձավ հարևան Ադրբեջանի որդեգրած քաղաքականությանը և նշեց, որ այն լուրջ մտահոգություն է առաջացնում, քանի որ այդ քաղաքականությունը սերմանում է բացասական վերաբերմունք Հայաստանի հանդեպ:

«Բոլորիս պարտքն է մեր ուժերը համախմբել հանուն ապագայի, մաղթում եմ արդյունավետ աշխատանք»,- ասաց Սահակյանը և վերջում հավելեց, որ ամբողջ աշխարհը պետք է համպատասխան քայլեր ձեռնարկի` անհանդուրժողականության մթնոլորտը վերացնելու համար: