8,5 մլն դոլար տանողին էսօր ազա՞տ են արձակում. Յուվեցի Կարոն՝ Գոհար Ենոքյանի մասին

Արդեն տեղեկացրել ենք, որ Երեւան քաղաքի վարչության` ձերբակալվածների պահման վայրից ժամեր առաջ ազատ է արձակվել գործարար, ԲՀԿ-ական նախկին պատգամավոր Գոհար Ենոքյանը: Նշենք, որ, հաշվի առնելով նրա տարիքը (73 տարեկան), փոխվել է Ենոքյանի խափանման միջոցը: ՁՊՎ-ից դուրս գալուց հետո Ենոքյանը լրագրողների հետ զրույցում հայտարարել է, որ անմեղ է, եւ որ վերեւում Աստված կա:

 Պարզվում է՝ երկրորդ կողմի՝ ԲՀԿ-ական Կարո Կարապետյանի՝ Յուվեցի Կարոյի հույսը եւս Աստված է: «8,5 մլն դոլար տանողին էսօր ազա՞տ են արձակում, սպանության փորձի համար... խնամու հետ ա խոսել: 8,5 մլն դոլարը չի՞ տարել, խարդախություն չի՞ արել, հերիք չէ՞ր էս ամենը, որ կալանավորվեր»,- Yerkir.am-ի հետ զրույցում, անդրադառնալով Ենոքյանի խափանման միջոցը փոխելուն, ասաց Կարո Կարապետյանը: Մեր այն դիտարկմանը, թե Ենոքյանը հայտարարում է, որ անմեղ է, պատգամավորը հակադարձեց. «Աստված տա մեկն էլ ինձ հանդիպի, 10 միլիոն տա, ես էլ հետո կհայտարարեմ, որ անմեղ եմ»:

 Կարո Կարապետյանը պատմեց նաեւ, որ գումարն առանց թղթաբանության է տվել, գումարը նրանք «չենջում են ֆռռացրել»: «Վստահելով եմ տվել, ես եմ մեղավոր, ես»,- ասաց նա եւ հայտարարեց, որ վերեւում Աստված կա: «Ով որ էդ գումարը կերել ա, Աստված իրան կպատժի»,- եզրափակեց նա:

Նշենք, որ, ըստ դատախազության հաղորդագրության, քրեական գործի նախաքննության ընթացքում փաստական տվյալներ են ձեռք բերվել այն մասին, որ Գոհար Ենոքյանը Արայիկ Ենոքյանի հետ, շահադիտական դրդումներով, Խաժակ Բադալյանի միջոցով Կարո Կարապետյանից վերցրած գումարները հափշտակելու և չվերադարձնելու նպատակով, ապօրինաբար կատարել են Կարո Կարապետյանին դիտավորությամբ կյանքից զրկելու` սպանության նախապատրաստությանն ուղղված գործողություներ, սակայն Արայիկ Ենոքյանը 2012 թվականի մարտի 15-ին խարդախությամբ առանձնապես խոշոր չափի գումար հափշտակելու կասկածանքով ձերբակալվել է, և նրանց նախապատրաստած հանցագործությունն ավարտին չի հասցվել` իրենց կամքից անկախ հանգամանքներով: Կատարված հանցավոր արարքի համար 07.05.2015թ. քրեական գործով որոշում է կայացվել Գոհար Ենոքյանին ներգրավել որպես մեղադրյալ` ՀՀ քր. օր-ի 35-104-րդ հոդվածի 2-րդ մասի 7-րդ և 8-րդ կետերով: