Սերբահայ գեղանկարչի ցուցահանդեսը` նվիրված Ցեղասպանության 100-րդ տարելիցին

Հայաստանում Սերբիայի Հանրապետության պատվո հյուպատոս Բաբկեն Սիմոնյանի նախաձեռնությամբ` այսօր` ժամը 14-ին, Հովհաննես Շարամբեյանի անվան ժողովրդական ստեղծագործության կենտրոնում կբացվի սերբահայ գեղանկարիչ Անամարիա Վարդապետյանի ստեղծագործությունների ցուցահանդեսը: Ցուցահանդեսը նվիրվում է Հայոց ցեղասպանության 100-րդ տարելիցին:

«Կյանք» խորագրի ներքո կներկայացվեն Անամարիա Վարդապետյանի բնանկարները, հայկական և սերբական մշակույթի հուշարձանները պատկերող նկարազարդումները, ինչպես նաև հայ և սերբ արվեստագետների դիմանկարները:

Սերբիայի նկարիչների միության անդամ, Բելգրադի արվեստի համալսարանի մագիստրոս և բարձրագույն մասնագիտական քոլեջի դասախոս Անամարիա Վարդապետյանն արտերկրում և Սերբիայում մասնակցել է 32 անհատական և 80 խմբակային ցուցահանդեսի: Ցուցադրությունը կգործի մինչև ապրիլի 25-ը: