Արցախում հանկարծամահ եղած զինվորը մահվանից րոպեներ առաջ խոսել էր եղբոր հետ

Արցախում մարտի 23-ին հանկարծամահ եղած Հայկ Մարգարյանը նախնական վարկածով մահացել է սրտի աորտայի անեւրիզմից: Այս մասին yerkir.am-ին հայտնեցին Հայկի հարազատները՝ նշելով, որ այժմ սպասում են դատաբժշկական փորձաքննության եզրակացությանը:

Մեզ հետ զրույցում հարազատները պատմեցին, որ մահվանից րոպեներ առաջ Հայկը խոսել է եղբոր հետ: «Սովորական զրույց ա եղել, ասել է` ո՞նց եսմ ասել ա` ամեն ինչ նորմալ ա, հանգիստ ա… »,- ասացին նրանք:

Հարազատների պատմածով՝ ամեն ինչ կատարվել է հանկարծակի, Հայկը վեր է կացել, ջուր ուզել ու միանգամից իրեն վատ զգացել:

Նրանց խոսքով՝ Հայկը երբեք չի դժգոհել ծառայությունից, լավ է ծառայել, հրամանատարության կողմից տարբեր պարգևների է արժանացել: Իսկ այն տեղեկությունը, որ ծառայության ընթացքում`  քնած ժամանակ, ընկերները նրա ձեռքի մեջ պայթուցիկ են դրել և վախեցրել, չի համապատասխանում իրականությանը: «Ինքն ուժեղ, աշխույժ տղա էր, նենց չի, որ խեղճ էր, նման բան չի եղել»,- ասացին հարազատները:

Նշենք, որ Հայկը լողորդ էր, գերազանցությամբ ավարտել էր ֆիզիկական կուլտուրայի հայկական պետական ինստիտուտի լողի բաժինը: Մտերիմների խոսքով՝  նա երբեք առողջական խնդիրներ չի ունեցել: