ՕԵԿ-ի ծիծաղն էլ եկավ

Այսօր` խորհրդարանական ճեպազրույցների ժամանակ, լրագրողները հարց ուղղեցին ՕԵԿ-ական պատգամավոր Հովհաննես Մարգարյանին, թե ճի՞շտ են այն խոսակցությունները, որ ՕԵԿ-ը փորձում է իր շարքերը համալրել ԲՀԿ-ից հեռացած մարդկանցով:

Հովհաննես Մարգարյանը պատասխանեց. «Մեղմ ասած, դա ապատեղեկատվություն է: Դա ծիծաղելի սուտ է: Պարզապես կան քննարկումներ, թե ինչպես պետք է շարունակենք հետագա քաղաքական պայքարը: Մենք չարախինդ քաղաքական ուժերից չենք: Հիմա էլ խոսում են ԲՀԿ-ի կուրացիայի մասին, որ վարչապետն է հանդիպել ԲՀԿ պատգամավորների հետ: Չգիտեմ, ինչ ասես` ասում են»:

Հովհաննես Մարգարյանի խոսքով` քաղաքական կյանքում տեղի ունեցած ցնցումը ցույց տվեց, որ մի քանի օրվա մեջ երկու քաղաքական ուժերը հայտարարություններ արեցին, փոխադարձ կոմպրոմատների գնացին, չարիքի հետ կապված փոխադարձ մեղադրանքներ հնչեցրեցին: Ըստ պատգամավորի` դրանից հետո հեղափոխական տրամադրությունները 24 ժամվա ընթացքում հօդս ցնդեցին:

Հետո Հովհաննես Մարգարյանը պատմեց, որ ՕԵԿ-ը միշտ սկզբունքային է եղել, որ ՕԵԿ-ականները չեն վախեցել ոչ մի բանից, որ անցել են քարքարոտ ճանապարհ:

Լրագրողներից մեկը հետաքրքրվեց, թե ինչի՞ց հետո պատգամավորն այդչափ նեղվեց, կաթի փոշու հետ կապված մեղադրանքից հետո՞: Պատգամավորը պատասխանեց. «Իմ նկատմամբ երբեք մեղադրանք չի հնչել` կաթի փոշու հետ կապված: Ես Գյումրիում ճանաչված մարդ եմ, բոլոր գյումրեցիները իմ թիկունքին կանգնած են: Այդ գործը արհեստականորեն ուզում էին փաթաթել իմ վզին, իմ ղեկավարած կառույցը գործ չի ունեցել կաթի փոշու հետ: Գյումրեցիներն ասում էին` փորձում են մինոիսկածելով ինչ-որ բան գտնել քեզ վրա»: