Ֆրեզնոյում Հայոց ցեղասպանության հուշարձանը պատրաստ կլինի մինչև ապրիլի 24-ը

Փետրվարի 11-ին Ֆրեզնոյում սկսվում են Հայոց ցեղասպանության զոհերի հիշատակի հուշարձանի բետոնալցման աշխատանքները:

Fresno Bee պարբերականի հաղորդմամբ` աշխատանքները նախատեսվում է ավարտել մինչև ապրիլի 24-ը՝ Հայոց ցեղասպանության 100-րդ տարելիցը: Հուշարձանի հիմնարկեքի արարողությունը՝ համայնքի ներկայացուցիչների և ամերիկացի պաշտոնյաների մասնակցությամբ, տեղի էր ունեցել 2014 թ. նոյեմբերի 2-ին:

Հուշարձանը կառուցվում է Ֆրեզնոյում ՀՀ պատվավոր հյուպատոս Պերճ Աբգարյանի, Լոս Անջելեսում ՀՀ գլխավոր հյուպատոսության և համայնքի համատեղ ջանքերով` Ֆրեզնոյում Կալիֆոռնիայի համալսարանի տարածքում: Նախագծի աջակիցներից է Կալիֆոռնիայի համալսարանի նախագահ Ջոզեֆ Կաստրոն:

Ֆրեզնոյի հայ համայնքը սկսել է ձևավորևվել 19-րդ դարավերջին։ Արդեն հաջորդ դարասկզբին հայերի թիվը հասել է 4.000-ի։ 1900-ին հիմնվել է առաջին հայ առաքելական` Սբ Երրորդություն եկեղեցին։ 2003-ի տվյալներով` Ֆրեզնոյում և շրջակայքում բնակվում է մոտ 60.000 հայ։ Քաղաքում հայկական տարբեր կազմակերպությունների գործունեությունը համադրելու համար ստեղծվել է Համագաղութային խորհուրդ։ Գործում են հայկական ռադիոժամեր։

Աղբյուրը՝ armeniangenocide100