Առևտրականները չեն հավատում ֆինասների նախարարությանը

«Շրջանառության հարկի մասին» նոր օրենքը, որի կիրառումը կառավարությունը արդեն մեկ անգամ հետաձգել էր` հոկտեմբերից տեղափոխելով փետրվար, կրկին հետաձգվեց նախագահի մոտ անցկացված խորհրդակցությունից հետո: Այս անգամ վարչապետ Հովիկ Աբրահամյանի ղեկավարած կառույցը նոր օրենքը հետաձգեց մինչև հուլիսի 1-ը` միևնույն ժամանակ վստահեցնելով, որ մինչև այդ իրենք նոր մոտեցումներ կգտնեն մինչև 58.3 միլիոն դրամի շեմը աշխատող ձեռնարկատերերի համար:

Չնայած կառավարության այս հայտարարությանը` առևտրականներն այնքան էլ լավատեսորեն չեն տրամադրված: Փոքր ձեռներեցների միության նախագահ Արմեն Ասլանյանը նշեց, որ իրենք այնքան էլ միամիտ չեն, որպեսզի հավատան ֆինանսների նախարարությանը և այն փաստին, որ մինչև հուլիսի 1-ը տվյալ կառույցն ամեն ինչ կանի այնպես, ինչպես պետք է: «Մենք պայքարելու ենք մինչև վերջ: Իշխանությունը պարտավոր է հաշվի նստել մեր կարծիքի հետ, մենք այնպես կանենք, որպեսզի վերանան նաև հարկային համակարգում առկա բոլոր կոռուպցիոն ռիսկերը: Փոքր ձեռներեցները չպետք է հեծանիվներով ման գան, իսկ չինովնիկները` մեքենաներով»,- նշում է Արմեն Ասլանյանը: