Էրդողանը Սերժ Սարգսյանին հրավիրել է Թուրքիա՝ նշելու Չանաքքալեի ճակատամարտի 100-ամյակը

Արդեն տեղեկացրել ենք, որ Թուրքիան ապրիլի 24-ին պատրաստվում է մեծ շուքով նշել Չանաքքալեի ճակատամարտի 100-ամյակը:

Թուրքական Haberler կայքը տեղեկացնում է, որ նախագահ Ռեջեփ Թայիփ Էրդողանն այդ առիթով Չանաքքալե է հրավիրել 102 երկրների նախագահների, այդ թվում` Հայաստանի նախագահ Սերժ Սարգսյանին և ԱՄՆ նախագահ Բարաք Օբամային:

Haberler-ը հայտնել է նաև, թե պետական պաշտոնյաներից մեկը Milliyet-ին տեղեկացրել է, որ նախագահ Էրդողանն այդ առթիվ երկրի նախագահներին նամակ է հղել: «Ուրախ կլինենք ձեզ տեսնել Չանաքքալեի ճակատամարտի 100-ամյակին»,- նշվել է նամակում:

Կայքը, նշելով, որ նամակն աչքի է ընկել Էրդողանի «խաղաղության» կոչերով, գրել է. «Նույն պաշտոնյան նշել է, որ Չանաքքալեի ճակատամարտում զոհվել են այլ էթնիկ արմատներ ունեցող երիտասարդներ, որոնց թվում եղել են հայեր: «Այսպես ասաց՝ միասին ենք կռիվ մղել, այդ իսկ պատճառով Սարգսյանն էլ հրավիրվեց»:

Փաստորեն, ըստ Թուրքիայի ղեկավարի տրամաբանության՝ հավանականություն կա, որ Հայաստանի նախագահը կարող է պատմական այդ օրը, երբ ողջ աշխարհի, ինչպես նաև հայության ուշադրության կենտրոնը պիտի լինի Ծիծեռնակաբերդը, լքի երկիրն ու հայտնվի Ցեղասպանությունն իրագործած և այն ուղիղ 100 տարի ժխտող իշխանության կողքին՝ ինչ-որ միջոցառում նշելու: