Կրթության ծրագրերի ներդրման տարի, որն ուղեկցվեց հին խնդիրներով

2014-ը նոր կրթական ծրագրերի ներդրման, կրթության մատչելիության բարձրացման տարի էր, որն ուղեկցվում էր հին խնդիրներով: Այս մասին այսօր լրագրողների հետ հանդիպման ժամանակ իր տարեվերջյան ամփոփիչ ասուլիսում հայտարարեց ՀՀ ԿԳ նախարար Արմեն Աշոտյանը:

Նախարարը, թվարկելով 2014-ին հաջողված 5 ծրագրերը, նախ նշեց, որ այս տարի իրենց հաջողվել է կտրուկ շրջադարձեր կատարել բարձրագույն կրթության ոլորտում ՝ կրթության մատչելիության հետ կապված: Որպես օրինակ` նախարարը նշեց ուսանողների սոցիալական աջակցության նոր փաթեթի մշակումը, ըստ որի` բոլոր բուհերն իրենց վճարովի ծառայությունների 7 տոկոսը պետք է ուղղեն ուսանողական զեղչերին. այս տարի 2000 երիտասարդ օգտվել է պետության կողմից երաշխավորված նոր սոցիալական ծրագրից:

«Հաջորդը կուզեի նշել նորարարական մրցակցային հիմնադրամների ներդրման ծրագիրը, որի շնորհիվ 10 ուսումնական հաստատություն ստացավ 3,7 մլն աջակցություն` ծրագիրն իրականացնելու համար: Մեզ համար կարևոր էր նաև կրթության գերազանցության ազգային ծրագրի մեկնարկը, ինչպես նաև «Հանրակրթության մասին օրենքի» նոր խմբագրության ընդունումը, որի հեղափոխական է երեխայի` մաքսիմալ ներառական և մատչելի ուսում ստանալու տեսանկյունից»,- ասաց նախարարը` հավելելով, որ ընթացիկ տարում 12-ով ավելացել է ներառական կրթություն իրականացնող դպրոցների թիվը:

Նախարարը, խոսելով ԿԳ ոլորտում արձանագրված այլ հաջողությունների մասին, ոլորտի նվաճումների «գոհարը» համարեց աշակերտական միջազգային օլիմպիադաների արդյունքը` մեր աշակերտական խմբերն այս տարի 19 օլիմպիական մեդալ են շահել:

Աշոտյանն անդրադարձավ նաև հանրակրթական դպրոցներում «Ազգային երգ ու պար» առարկայի պիլոտային ծրագրին` նշելով, որ այն փորձարկվում է 12 դպրոցում, սակայն տեսանելի ապագայում պարտադիր կլինի բոլոր դպրոցների համար:

Նախարարը կարևորեց նաև «Շախմատ» առարկայի եռամյա ծրագրի ներդրումը հանրակրթական դպրոցներում: Ըստ նրա՝ այսուհետ դպրոցներում կգործեն շախմատի արտադասարանային խմբակներ:

ԿԳ նախարարը խոսեց նաև կրթության համակարգում կոռուպցիոն ռիսկերի մասին` նշելով, որ, ճիշտ է, կոռուպցիան համակարգում վերացված չէ, սակայն այն զգալիորեն նահանջել է, և կոռումպացված ոլորտների առաջին եռյակում չէ.«Սա սիմվոլիկ հաջողություն է, որը, սակայն, մեզ չի գոհացնում, պետք է աշխատել այս ուղղությամբ»:

Նախարարն անդրադարձավ նաև 2015-ին Հայաստանում կայանալիք Բոլոնյան նախարարական համաժողովին` հավաստիացնելով, որ ԿԳ նախարարության լրացուցիչ ջանքերի շնորհիվ այսօր միջազգային ասպարեզում Հայաստանի տեղը տեսանելի և երևելի է:

Ի դեպ, Աշոտյանը նշեց, որ 2015-ին Ցեղասպանության 100-րդ տարելիցի հետ կապված իրականացվող միջոցառումներից նախարարությունը ևս անմասն չի մնա` Ցեղասպանությանը նվիրված դասընթացներ կլինեն մի շարք եվրոպական երկրների հանրակրթական ծրագրերում:

Անդրադառնալով հանրակրթական դպրոցներում դասագրքերի թեմային` Աշոտյանն ասաց, թե դպրոցական դասագրքերի որակը բարձրացել է.«Սրան զուգահեռ` դասագրքերի բարդության աստիճանը դեռևս շարունակում է խնդիր մնալ, քանի որ դրանք որոշակիորեն մատչելի չեն տվյալ տարիքի երեխաների համար»: