«Կարող եք դիմել դատարան, որ վարույթ սկսեն ու ինձ հայտարարեն հայոց լեզվի թշնամի»

Այսօր ԱԺ արտաքին հարցերի հանձնաժողովում հանձնաժողովի անդամ` ԱԺ ընդդիմադիր պատգամավոր Նիկոլ Փաշինյանը առաջարկեց օրակարգում ևս երկու կետ ավելացնել:

Մեկն այն է, որ ԱԺ արտաքին հարցերի հանձնաժողովը հանդես գա դատապարտող հայտարարությամբ` ՀԱԿ խմբակցության պատգամավոր Արամ Մանուկյանին ծեծի ենթարկելու հետ կապված: Երկրորդ առաջարկը վերաբերում էր նրան, որ հանձնաժողովը քննարկի ՀՀԿ-ական պատգամավոր Արտակ Զաքարյանի գործողությունները և տա գնահատական: Մասնավորապես, Փաշինյանի խոսքով, դեկտեմբերի 9-ին ԱԺ-ում տեղի է ունեցել «Լեզվի մասին» օրենքի կոպտագույն խախտում, երբ հայ-ռուսական բարեկամության ակումբում նիստը վարել են ռուսերեն: ԱԺ արտաքին հարցերի հանձնաժողովի նախագահ Արտակ Զաքարյանն ու ԱԺ կրթության հանձնաժողովի նախագահ Արտակ Դավթյանը ներկա են եղել և ոչ միայն թույլ են տվել, որ օրենք խախտվի, նաև խոսել են ռուսերեն:

Նիկոլ Փաշինյանը նշեց, որ լեզվի պետական տեսչության պետի տեղակալն արդեն հանդես է եկել հայտարարությամբ, որ այդ ակումբում լեզվի մասին օրենքն է խախտվել: Պատգամավորը նշեց, որ օրենքը երեք անգամ անընդմեջ խախտելուց հետո նախատեսվում է քրեական գործ հարուցել:

«Դատապարտում եմ ԱԺ նախագահ Գալուստ Սահակյանի կեցվածքը, երբ ինքը ԱԺ նիստում հայտարարում է, որ սրանից հետո կապահովվի լեզվի մասին օրենքի պահանջը, բայց այդ ակումբի նիստին իր պաշտոնական ուղերձն է հղում ռուսերեն լեզվով, որը նաև չի թարգմանվում հայերեն: Այդ հարցի հետ կապված` ես հարցումներ եմ անելու, որպեսզի ընթացակարգեր հարուցվեն»,- ասաց Նիկոլ Փաշինյանը:

Նա դիմեց նաև հանձնաժողովի նախագահ Արտակ Զաքարյանին. «Դուք անձամբ ներկա եք եղել այդ նիստին և, որպես հանձնաժողովի նախագահ, ցուցաբերել եք անգործություն: Ես ցավում եմ, որ Դուք տեղյակ չեք լեզվի մասին օրենքից»:

Արտակ Զաքարյանը պատասխանեց. «Այո, ներկա եմ եղել և խոսել եմ ռուսերեն ու ռուսերենով մասնակցել դեբատներին: Մի' կասկածեք լեզվի մասին օրենքից` իմ տեղեկացվածությանը: Ոչ ֆորմալ ձևաչափը պետք է առանձնացնել պաշտոնական ձևաչափից, ըստ այդմ` այդ ակումբը ֆորմալ չէ, այդտեղ չի եղել ֆորմալ հանդիպում: Դուք չեք կարող ցույց տալ որևէ ֆորմալ հանդիպում, որտեղ համաժամանակյա թարգմանություն չի եղել: Օրեր առաջ ԱԺ-ի իմ սենյակում ես անգլերենով հարցազրույց եմ տվել, հիմա դա օրենքի խախտո՞ւմ եք համարում»:

ԱԺ պատգամավոր Ալեքսանդր Արզումանյանը, հարցի հետ կապված, նշեց. «ԱԺ-ից դուրս ոչ ֆորմալ հանդիպում կարելի է «Բելաջիո»-ում կազմակերպել, բայց ԱԺ-ում ցանկացած հանդիպում ֆորմալ է: Նաև տարակուսելի է, որ այդ ակումբի աշխատանքներին չեն հրավիրվում ընդդիմադիր գործիչներ, որոնք կկարողանային իշխանության ներկայացուցիչների կարծիքներից տարբերվող կարծիք արտահայտել, ասել, որ սխալ է ԵՏՄ-ին միանալը, ասել, որ սխալ է ռուսերեն խոսելը»:

Վարման կարգով խոսեց նաև ԱԺ ՀՀԿ-ական պատգամավոր Սամվել Ֆարմանյանը` արտահայտելով իր կարծիքը Նիկոլ Փաշինյանի երկու առաջարկությունների վերաբերյալ:

«Չի գտնվի որևէ պատգամավոր, որ կարող է չդատապարտել խորհրդարանի անդամի նկատմամբ կիրառված բռնության հանգամանքը: Երկուշաբթի մենք կունենանք խորհրդարանի արտահերթ նիստ, որտեղ կարող ենք դրա մասին հայտարարություններ անել: Բայց դա այն դեպքը չէ, որ վազենք արագ ու փորձենք մեկ քայլ առաջ ընկնել: Մենք ազատ ենք մեր կարծիքն արտահայտելու մեջ: Ես կասեմ, որ խիստ դատապարտելի է այդ դեպքը, և իրավապահ մարմինները օր առաջ պետք է տեղեկատվություն ներկայացնեն խորհրդարանին:

Ինչ վերաբերում է երկրորդ պահանջին, բոլորս էլ հասկանում ենք, որ այդ առաջարկը մեր այսօրվա նիստը առավել հետաքրքիր դարձնելու նպատակ է հետապնդում: Չեմ համարում, որ կա մեր լեզվին սպառնացող վտանգ, եթե նման վտանգ լիներ, ես պատրաստ կլինեի դառնալ Ձձեր համախոհը: Բայց այդ ակումբում հանդիպումները մասնավոր են, այսինքն` նման բան նախատեսված չէ ո'չ Սահմանադրությամբ, ո'չ էլ ԱԺ կանոնակարգով, հետևաբար, նրա կողմից անցկացված որևէ միջոցառում չի կարող տեղավորվել պաշտոնական ֆորմատում»:

Արտակ Զաքարյանը պահանջեց անցնել օրակարգի հաստատմանը` Նիկոլ Փաշինյանին դիմելով. «Կարող եք դիմել դատարան, որ վարույթ սկսեն ու ինձ հայտարարեն հայոց լեզվի թշնամի»:

Փաշինյանի առաջարկությունները դրվեցին քվեարկության, որոնց կողմ էին միայն Նիկոլ Փաշինյանը և Ալեքսանդր Արզումանյանը: Հանրապետական պատգամավորները ձայների մեծամասնությամբ դեմ էին այդ առաջարկնբերին, և առաջարկությունները չընդունվեցին: