Ինչպես է իրականացվելու հայկական ապրանքի արտահանումը ԵՏՄ-ին միանալուց հետո

Այսօր ԱԺ-ում շարունակվում է ԵՏՄ-ին Հայաստանի անդամակցության պայմանագրի վերաբերյալ քննարկումը:

ԱԺ ՀՀԿ խմբակցության պատգամավոր Գագիկ Մինասյանը հարցրեց հիմնական զեկուցող` ՀՀ ֆինանսների փոխնախարար Սուրեն Կարայանին, թե ինչպե՞ս է տեղի ունենալու Հայաստանից դեպի ԵՏՄ երկրներ ապրանքների արտահանումը:

«Որպեսզի ապրանքը Հայաստանից դուրս գա, մաքսային մարմիներն ի՞նչ գործառույթներ են իրականացնելու, ի՞նչ թղթեր են պահանջելու, ի՞նչ ստուգումներ են անցկացնելու, որ դնեն այդ պլոմբը: Եվ երբ բեռնատարը մտնում է Ռուսաստան, ի՞նչ պրոցես է տեղի ունենում»,- հետաքրքրվեց Գագիկ Մինասյանը:

Սուրեն Կարայանը նշեց, որ Հայաստանից արտահանելիս արտահանողը պետք է ներկայացնի հաշիվ ապրանքագիր, թե ինչ ապրանք է արտահանում, և Հայաստանի մաքսային մարմինները որևէ գործառույթ չեն իրականացնում, ընդամենը կապարակնքում են այդ բեռնատարը:

Վրաստան մուտք գործելիս վրացական մաքսային մարմինները իրենց տարանցիկ կնիքն են դնում: Վրաստանից դուրս գալիս այդ երկրի մաքսային մարմինները ստուգում են կնիքները` դրանք տեղո՞ւմ են, թե՞ ոչ: Ռուսաստան մտնելիս ռուսական մաքսայինները պետք է նայեն, թե հայկական մաքսային մարմինների կողմից դրված կապարակնիքը տեղո՞ւմ է, թե՞ ոչ:

«Եթե ռուս մաքսայինները տեսնում են, որ հայ մաքսայինների կողմից դրված կնիքը տեղում է, ապա ոչ մի զննում չի իրականացվում, և բեռնատարը ուղևորվում է իր նշանակման վայրը»,- ասաց Սուրեն Կարայանը: