Մենք պատրաստ ենք առերեսվել պատմության հետ. Թուրքիայի մեջլիսի նախագահը՝ Հայոց ցեղասպանության ճանաչման մասին

«Մենք պատրաստ ենք առերեսվել պատմության հետ»,- Ալբանիա այցելության ժամանակ ասել է Թուրքիայի Ազգային մեծ ժողովի նախագահ Ջեմիլ Չիչեքը՝ նկատի ունենալով 1915 թվականի վերաբերյալ մի շարք խորհրդարաններում ընդունված օրենքները:

Լրագրողների հետ հանդիպման ժամանակ Չիչեքը հայտնել է, որ տեղի են ունեցել չորս հիմնական թեմաների վրա կենտրոնացած հանդիպումներ, որոնք իրականացրել են ցույց տալու համար, թե «պնդումներից վախենալու ոչինչ չունեն»:

«Այդ թեմաներից մեկն այն է, որ 2015 թվականին ընդառաջ՝ աշխարհին փորձում են խաբել, թե 1915 թվականին ցեղասպանություն ենք իրագործել: Այդ ուղղությամբ էլ հայկական լոբբին ակտիվ աշխատանքներ է իրականացնում, որպեսզի խորհրդարաններում այդ մասին օրինագծեր անցկացնի: Մենք այս պնդումներից չենք վախենում: Մենք պատրաստ են առերեսվել պատմության հետ, սակայն խորհրդարանները միջազգային քրեական դատարան չեն: Խորհրդարանների պարտականությունը խաղաղության, բարեկամության և քաղաքական հարաբերություններին նպաստելը, այսօրն ու ապագան կառուցելն է: Եթե խորհրդարաններին նման զրպարտությունների հարցում գործիք դարձնենք, դրանից կտուժեն բոլոր երկրները»,- ասել է նա:

Հիշեցնենք, որ Թուրքիայում քրդամետ Ժողովուրդների դեմոկրատական կուսակցությունից կին պատգամավոր Սեբահաթ Թունջելը Օսմանյան կայսրությունում տեղի ունեցած կոտորածները ճանաչելու եւ ներողություն խնդրելու օրինագիծ է ներկայացրել երկրի խորհրդարանին, որի հաստատման դեպքում Թուրքիան ճանաչելու է Հայոց ցեղասպանությունն ու ապրիլի 24-ը նշվելու է որպես սգո օր, ինչպես նաև տրվելու է նյութական և բարոյական փոխհատուցում: