«Սեքս-սկանդալ» արտահայտությունը լրագրողները սիրեցին. նախարարը որոշել է միջամտել գործին

ԿԳ նախարար Արմեն Աշոտյանը որոշել է միջամտել ճարտարագիտական համալսարանում տեղի ունեցող սկանդալային իրադարձություններին միմիայն նախարարության լիազորությունների շրջանակում:

Այսօր լրագրողների հետ զրույցում, պատասխանելով հարցին, թե ի՞նչ նորություններ կան ճարտարագիտական համալսարանում զարգացող սեքս-սկանդալի վերաբերյալ, Արմեն Աշոտյանը պատասխանեց. «Չգիտեմ, թե ինչ է տեղի ունենում պոլիտեխնիկում, բայց այդ «սեքս-սկանդալ» արտահայտությունը լրագրողները սիրեցին»:

Նա նշեց, որ ցավում է այդ պատմությունների համար, ցավում է, որ համալսարանի ռեկտորն ու աշխատակիցները չեն գործադրում ջանքեր, որպեսզի բուհը դադարի դառնալ բացասական լրահոսի ու թեժ վերնագրերի թեմա: «Իմ մտահոգությունը և անհանգստությունը, բնականաբար, արտահայտվելու է իմ լիազորությունների շրջանակում գործողությունների մեջ»,- ասաց նախարարը:

Նա ընդգծեց, որ պետք է տարանջատել հարուցված քրեական գործը, որի վրա ԿԳ նախարարությունը չունի լիազորություն` ազդելու, և հնչեղություն ստացած մի քանի խնդիրներ, հատկապես` պրոռեկտորին և ՏՏ վարչության պետին աշխատանքից ազատելու փաստերը, որոնց կապակցությամբ ԿԳ նախարարին են ուղղվել բաց նամակներ ու պաշտոնական գրություններ, որպեսզի նախարարը միջամտի:

«Իմ միջամտությունը կլինի օրենքի շրջանակներում, համապատասխան քայլեր կձեռնարկվեն նախարարության կողմից: Իսկ թե ի՞նչ որոշումներ կկայացվեն իմ կողմից, պետք է սպասել, որովհետև կախված է այն բանից, թե ինչ կհայտնաբերենք մենք` երկու կողմին էլ լսելով: Լինելու ենք բացարձակապես անաչառ, բացարձակապես արդար»,- ասաց Արմեն Աշոտյանը: