WikiLeaks. Սեքս` սննդի դիմաց

WikiLeaks կողմից դիվանագիտական փաստաթղթերի հերթական գաղտնազերծումը բացահայտել է ՄԱԿ-ի խաղաղապահների հանցագործությունները Աֆրիկայի աղքատ երկրներում:

Պարզվում է ՄԱԿ-ի բենինցի խաղաղապահները Քոթ դ'Իվուարում եղած ժամանակ անչափահաս երեխաներին սննդամթերքի դիմաց սեքսի են պարտադրել: Ըստ փաստաթղթերի` 8 աղջնակ խոստովանել են, որ ինտիմ կապերի մեջ են մտել բենինցի զինվորների հետ, որոնք այնուհետեւ իրենց սնունդ են տվել:

«Ապրիլին Բենինի իշխանություններին բանավոր նոտա է հղվել` 6 զինվորի եւ 10 բարձրաստիճան զինվորականի նկատմամբ կարգապահական միջոցառումներ ձեռնարկելու պահանջով»,- ըստ mignews.com-ի` լրագրողներին հայտնել է ՄԱԿ-ի մամուլի քարտուղարի տեղակալ Էդուարդո դել Բույը:

Նույն նոտայում տեղեկացվել է, որ նշված զինծառայողներին, որոնք վերադարձել են հայրենիք, արգելվում է այսուհետ մասնակցել ՄԱԿ-ի խաղաղարար գործողություններին: