Արծվիկ Մինասյանը կարևորում է առողջապահության ոլորտում ծրագրային բյուջետավորումը

ԱԺ առողջապահության հարցերի հանձնաժողովի հետ քննարկվում է 2015թ. բյուջեն: ԱԺ ՀՅԴ խմբակցության պատգամավոր Արծվիկ Մինասյանը մի շարք հարցեր ուներ ֆինանսների փոխնախարար Պավել Սաֆարյանին առողջապահության ոլորտի բյուջեի մասին:

Պատգամավորի առաջին հարցը վերաբերում էր ծրագրային բյուջետավորմանը, թե արդյո՞ք առողջապահության նախարարությունը կարողանում է բավարար չափով ներկայացնել ոչ ֆինանսական այն ցուցանիշները, որոնք պետք է հիմք հանդիսանան ֆինանսավորման համար: Մյուս հարցը վերաբերում էր այն փաստին, որ առաջին անգամ բյուջեում հարկային ծախսումների հետ կապված արտոնություններ կան, որոնց հարկերը չեն մուտքագրվելու բյուջե, և որքանով է դա արդյունավետ:

Հաջորդ հարցը վերաբերում էր դեղերի վրա սահմանված ակցիզային դրոշմանիշերին, որի կապակցությամբ դեղերի ներկրմամբ զբաղվող ընկերությունները աղմուկ են բարձրացրել, որ դեղերի գների աճ է տեղի ունենալու: «Արդյոք ֆինանսավորման ժամանակ հաշվի առնվե՞լ է այդ փաստը, թե՞ ոչ, և  կառավարությունը նախատեսո՞ւմ է այս ուղղությամբ մեղմել քաղաքականությունը»,- հարցրեց Արծվիկ Մինասյանը:

ԱԺ ՀՀԿ խմբակցության պատգամավոր Արա Բաբլոյանը նշեց, որ կողմ է ծրագրային բյուջետավորման հստակեցմանը, և քանի որ առողջապահությունը բարդ ոլորտ է, առաջարկվել է սկսել մեկ տողից` սրտային հիվանդությունների դեպքում անհետաձգելի միջամտությունների համար:

Ծրագրային բյուջետավորման հետ կապված` Պավել Սաֆարյանը նշեց, որ միայն կառավարությունը չի կարող դա անել, և անհրաժեշտ է Ազգային ժողովի աջակցությունն ու կառավարության հետ արդյունավետ փոխգործակցությունը: Ըստ փոխնախարարի` ծրագրային բյուջետավորման մեջ խնդիրն առաջանում է ոչ ֆինանսական ցուցանիշների հետ կապված, այն է` քանակական, որակական, ժամկետային:

Ինչ վերաբերում է հարկային արտոնություններին, ֆինանսների փոխնախարարի խոսքով` կառավարությունը գնահատել է հարկային ծախսումները, և հարկային օրենսդրությունը բազմաթիվ արտոնություններ է տրամադրում: