Ինչ է իրականում կատարվել քառյակում. Աղվան Վարդանյանը խոսեց բաց

Ոչ իշխանական երեք ուժերի հանդիպումից հետո լրագրողների հետ զրույցում ԱԺ «Ժառանգություն» խմբակցության ղեկավար Ռուբեն Հակոբյանը հայտնեց, որ վաղը հրապարակելու են 12 կետերի արձագանքի գնահատականը, եւ որ դա լինելու է եռյակի գնահատականը, ՀՅԴ-ն տեղյակ է դրա մասին:

ԱԺ ՀՅԴ խմբակցության քարտուղար Աղվան Վարդանյանը մանրամասն ներկայացրեց 12 կետերի ամփոփման ոդիսականը եւ հայտնեց, որ ՀՅԴ-ն մեղք չունի, որ այն դարձել է եռյակի ամփոփում:

Ըստ նրա` նախօրոք պայմանավորվածություն է եղել` հոկտեմբերի 8-ին առավոտյան քառյակով հանդիպել եւ վերջնական եզրակացության գալ, բայց դրա նախորդ օրը ՀՅԴ-ին ասել են, որ զբաղված են, եւ առաջարկել են աշխատել գրավոր տարբերակով: Եռյակն ուղարկել է իրենց կողմից մշակված տեքստի տարբերակը, ՀՅԴ-ն ներկայացրել է իր տարբերակը, սակայն արձագանք եռյակի կողմից այդպես էլ չեն ստացել:

«Մենք չենք ասել` դուք եռյակով արեք, իրենք են որոշել: Առանց գործընկերներին տեղակացնելու, որոնց հետ երկար ճանապարհ ես անցել... Այս ոճը մեզ համար ընդունելի չէ»,- ասաց Վարդանյանը: Նա եւս մեկ անգամ հիշեցրեց, որ քառյակը քառյակ է այնքան ժամանակ, քանի կար միասնական դիրքորոշում: