Օֆշորի գործով տուժող Հայրապետյանն ու մեղադրյալ Սուքիասյանն առերեսվել են

Անցյալ շաբաթ, քննիչի որոշմամբ, երկու անգամ առերեսվել են օֆշորային սկանդալի գործով տուժող` գործարար Փայլակ Հայրապետյանն ու գործով մեղադրյալ` ադամանդագործ Աշոտ Սուքիասյանը: Այս մասին yerkir.am-ին հայտնեց Սուքիասյանի պաշտպան Յուրի Խաչատրյանը:

Ըստ նրա` եթե գործի շրջանակներում Սուքիասյանի և Հայրապետյանի ցուցմունքներում այլ հակասություններ ևս հայտնաբերվեն, նրանք դարձյալ կառերեսվեն: Փաստաբանը նաև նշեց, որ առերեսմանը Հայրապետյանը ներկայացել էր առանց պաշտպանի:

Նշենք, որ ավելի վաղ սնանկացման եզրին հայտնված գործարարը հրաժարվել էր պաշտպան Վաղարշակ Գևորգյանի ծառայություններից: Այնուհետև հայտնի դարձավ, որ նրա շահերը պաշտպանելու է փաստաբան Կրոմվել Գրիգորյանը, որի ծառայություններից շուտով գործարարը նույնպես հրաժարվեց: Շուրջ մեկ շաբաթ է` մեզ չի հաջողվում կապ հաստատել Հայրապետյանի հետ, քանի որ նրա հեռախոսն «անհասանելի» է:

Նշենք, որ ՀՀ քրեական դատավարության օրենսգրքի 216-րդ հոդվածի 1-ին մասով նախատեսված է, որ քննիչն իրավունք ունի կատարել նախօրոք հարցաքննված երկու այն անձանց առերեսումը, որոնց ցուցմունքներում էական հակասություններ կան: Քննիչը պարտավոր է կատարել առերեսում, եթե էական հակասություններ կան մեղադրյալի և մեկ այլ անձի ցուցմունքներում:

Այս դեպքի կապակցությամբ հարուցված քրեական գործը գտնվում է ՀՀ ոստիկանության Քննչական գլխավոր վարչության ՀԿԳ քննության վարչության վարույթում: Գործով մեղադրյալ Աշոտ Սուքիասյանն իրեն մեղավոր չի ճանաչում: Նրան մեղադրանք է առաջադրված առանձնապես խոշոր չափերի խարդախության (ՀՀ Քր.օր. 178-րդ հոդվածի 3-րդ մասի 1-ին կետ), խաբեության կամ վստահությունը չարաշահելու եղանակով առանձնապես խոշոր չափերի գույքային վնաս պատճառելու (184-րդ հոդ. 2-րդ մասի 1-ին կետ) և հանցավոր ճանապարհով ստացված առանձնապես խոշոր չափերի եկամուտներ օրինականացնելու (190-րդ հոդ. 3-րդ մասի 1-ին կետ) համար: Վերջինը փողերի լվացման հայտնի հոդվածն է: Նշենք, որ, ըստ մեղադրանքի, Աշոտ Սուքիասյանը փողերը լվացել է «Ամերիաբանկի» միջոցով: Ըստ շրջանառվող տեղեկությունների` այս գործում գլխավոր մասնակցություն ունեն ՀՀ վարչապետ Տիգրան Սարգսյանը եւ Արարատյան հայրապետական թեմի առաջնորդ Նավասարդ Կճոյանը: