Օֆշորի գործով մեղադրողի վարքագծի կապակցությամբ դատավորը կդիմի գլխավոր դատախազին

Էրեբունի և Նուբարաշեն վարչական շրջանների ընդհանուր իրավասության դատարանում այսօր հերթական անգամ հետաձգվեց օֆշորային սկանդալի գործի քննությունը. դատարան չէր ներկայացել գործով մեղադրող Դ. Վեքիլյանը:

Նախագահող դատավոր Վարդան Գրիգորյանն ասաց, որ արդեն երկրորդ դատական նիստն է՝ մեղադրողը չի ներկայանում դատարան՝ առանց տեղեկացնելու չներկայանալու պատճառների մասին: Նա նշեց, որ դատարանը ստիպված է նրա վարքագծի կապակցությամբ հաղորդում ներկայացնել ՀՀ գլխավոր դատախազին՝ դատական նիստերին մեղադրողի պատշաճ մասնակցությունն ապահովելու նպատակով:

Նշենք, որ նիստը սկսվեց մոտ 40 րոպե ուշացումով: Դատավորի խոսքով՝ այդ ընթացքում փորձել են ճշտել մեղադրողի չներկայանալու պատճառները, բայց այդպես էլ չեն կարողացել ճշտել: Այսպիսով` այսօրվա դատական նիստը հետաձգվեց մինչև փետրվարի 4-ը: