Գերոգի Վանյանը ռուսական ԿԳԲ-ի գործակալ է. Շանթ Հարությունյան

Շանթ Հարությունյանի եւ ընկերների գործով դատավարությունը շարունակվում է, այսօրվա նիստում հարցաքննվեցին անցյալ տարվա նոյեմբերի 5-ին տեղի ունեցած դեպքերի հետևանքով տուժող ոստիկանները: Հարցաքննությունների ավարտից հետո ամբաստնյալները սկսեցին իրենց հայտարարություններն անել:

Շանթ Հարությունյանն անդրադարձավ Գեորգի Վանյանի` հայկական տարածքում սպանված ադրբեջանցի դիվերսանտի հարազատներին ցավակցելու վերջին հայտարարությանը: Նա նշեց, որ մինչ վերջերս կարծել է, թե Վանյանը ազնիվ մարդ է, ով հարգում է մարդու իրավունքը, սակայն վերջին դեպքից հետո, երբ հայը ցավում է ադրբեջանցի դիվերսանտի մահվան համար, ապա հասկացել է, որ նա հեռու է ազնվությունից:

Շանթ Հարությունյանի խոսքով, միայն ռուսական անվտանգության ծառայության աշխատակիցը կարող է նման հայտարարություններ անել և մնալ անպատիժ: Եվ որ Մոսկվայի կարգադրությունն է` որքան հայհոյում են Մոսկվային, այնքան էլ պետք է գովաբանի թուքերին` հայերի ուղեղներում արմատացած ոխերիմ թշնամուն: Եվ որ եթե նա լիներ Ադրբեջանի կամ Թուրքիայի գործակալ, նրան անմիջապես կձերբակալեին. «Գեորգի Վանյանի պահվածքը մի անուն ունի. հայրենիքի դավաճանություն»:

Հայտարարությամբ հանդես եկավ ամբաստանյալներից Ավետիս Ավետիսյանը: Նա խոսեց հայկական հեռուստաընկերությունների քայքայիչ գործունության մասին: Նրա խոսքով, եթերը լցված է այնպիսի հաղորդումներով, որոնք բարձր արժեքները ծաղրի են ենթարկում` ընտնաիքին նվիրվածությունը, ընկերությունը, սերը գիտելիքի հանդեպ, և այլն:

Ամբաստնյալներից Ենոք Պողոսյանն էլ իր հայտարարությունը սկսեց Ավետիս Ավետիսյանին շնորհավորելով` ասելով, թե այսօր նրա ծննդյան տարեդարձն է: Այնուհետև ասաց, որ այսօր նաև իր ամուսնության 15-ամյակն է և իր երախտագիտությունը հայտնեց դահլիճում նստած կնոջը` իրեն հինգ զավակ պարգևելու համար:

Դատարանը` դատավոր Մնացական Մարտիրոսյանի նախագահությամբ, ընդհատեց նրա հայտարարությունը և խնդրեց կնոջն ուղղված մյուս խոսքերն ասել առանձին հանդիպման ժամանակ:

Ամբաստնյալ Վարդան Վարդանյանն էլ իր ելույթն ավարտեց իշխանություններին, ոստիկանության ղեկավարությանը կոչով, որ այնպես անեն, որ ոստիկանները «ջղված շալվարներով» չգան աշխատանքի:

Մինչ ամբաստնյալների հայտարարությունները դահլիճում ներկա ծեր կինը, ով, ամենայն հավանականությամբ, ամբաստանյալներից մեկի հարազատներից է, «սպառնաց» դատավորին իր ձեռնափայտով. «Վերջում պիտի հանդիպենք, թե չէ գավազանով եմ…»: