Թող ինձ և իմ ընկերներին չխառնեն մյուս ընդդիմադիրների հետ. Շանթ Հարությունյան

Նոյեմբերի 5-ին Մաշտոցի պողոտայում տեղի ունեցած անկարգությունների գործով կալանավորված, իսկ ներկայումս «Նուբարաշեն» հոգեբուժարանում գտնվող Շանթ Հարությունյանի փաստաբան Ինեսա Պետրոսյանն իր պաշտպանյալի վրա բռնության հետքեր չի նկատել: Այս մասին փաստաբանը հայտնեց լրագրողների հետ հանդիպման ժամանակ` նշելով, որ այսօր առավոտյան է տեսակցել իր պաշտպանյալին:

Փաստաբանի խոսքով` Շանթը գոհ է հոգեբուժարանի անձնակազմից, նրա վիճակը նորմալ է, միայն մտահոգված է այն բանից, թե ինչու ինքը պետք է գտնվի հոգեբուժարանում:

Yerkir.am-ի հարցին, թե Շանթին ներկայացվե՞լ է նոյեմբերի 5-ի գործով մյուս կալանավորվածների ցուցակը, և արդյո՞ք նա բոլորին ճանաչել է, Պետրոսյնաը պատասխանեց. «Այո’, ներկայացվել է, և եղել են անուններ, որոնց նա չի ճանաչել եւ կասկածներ ունի, որ այդ անձինք էլ, հնարավոր է, հենց սադրիչներ լինեն»:

Նշենք, որ Շանթը և նրա կողմնակիցները դեպքից առաջ հայտարարել էին, որ սադրիչներ կան, ովքեր նպատակ ունեն խոչընդոտել իրենց խաղաղ երթին:

«Թող ինձ և իմ ընկերներին չխառնեն մյուս ընդդիմադիրների հետ»,- փաստաբանի հետ զրույցում ասել է Շանթը:

Փաստաբանը հերթական անգամ շեշտեց, որ իր պաշտպանյալին առաջադրված մեղադրանքն անհիմն է, և ակնհայտ է, որ նա հոգեկան հիվանդությամբ չի տառապում: