Եվրապատգամավորների հարցերը հունից հանել են Ալիևին

Ստրասբուրգում ԵԽԽՎ անդամների առջև ելույթն ավարտելուց հետո Ադրբեջանի նախագահ Իլհամ Ալիևը կես ժամ պատասխանել է իրեն ուղղված հարցերին, որոնց մեծ մասը տհաճ են եղել. գրում է ադրբեջանական contact.az-ը։

Ըստ կայքի՝ եվրապատգամավորները հարցրել են տասնյակ քաղբանտարկյալների, ակտիվիստների, լրագրողների ձերբակալությունների ու խոսքի ազատության ոտնահարման դեպքերի մասին։

Ալիևն, ի պատասխան, նշել է, որ Ադրբեջանում չկան լրագրողներ, որոնք ձերբակալվել են պրոֆեսիոնալ գործունեության համար, նաեւ հավելել է, որ նրանք սխալ տեղեկատվություն ունեն:

Իսկ վերջին նախագահական ընտրություններում տեղի ունեցած խախտումների մասին հարցերն Ալիևին ուղղակի հանել են հունից։ Նա հարցը տված բրիտանացի պատգամավորի վրա մատ է թափ տվել և նրան մեղադրել է ստախոսության մեջ։

«Ձեր հարցում երկու անգամ ստել եք։ Առաջինը՝ բոլոր դիտորդները հաստատել են, որ ընտրություններն արդար և ազատ են եղել։ Ամենագլխավորը, որ այդ ընտրությունն արտահայտել է ժողովրդի կամքը, իսկ խախտումներ և կեղծիքներ Ձեր երկրում են տեղի ունենում»,- ասել է նա: