Լևոն Ջուլֆալակյանը հրապարակել է Դորտմունդ մեկնող ըմբիշների անունները

Հունիսի 28-29-ը Դորտմունդում կկայանա հունահռոմեական ըմբշամարտի միջազգային ներկայացուցչական մրցաշար: Մրցագորգ դուրս կգան 20-ից ավելի երկրների ուժեղագույն ըմբիշներ: Հայաստանի հավաքականը մրցավայր կմեկնի 11 ըմբիշով:

Ինչպես տեղեկացնում է մարզաձևի Հայաստանի պաշտոնական կայքը, Դորտմունդում իրենց հնարավորությունները կփորձեն 59 կգ քաշային, օլիմպիական խաղերի բրոնզե մեդալակիր, Եվրոպայի բազմակի չեմպիոն և աշխարհի բազմակի մեդալակիր Ռոման Ամոյանն ու երիտասարդների աշխարհի առաջնության հաղթող Կարեն Ասլանյանը, 66 կգ քաշային Արամ Ջուլֆալակյանը, 71 կգ քաշայիններ Ռաֆայել Ալեքսանյանն ու Վարշամ Բորանյանը, օլիմպիական արծաթե մեդալակիր, Եվրոպայի չեմպիոն և աշխարհի բազմակի մրցանակակիր Արսեն Ջուլֆալաքյանը, 81 կգ քաշայիններ Ռաֆիկ Մանուկյանն ու Հրաչ Հովհաննիսյանը, 85 կգ քաշայիններ Արթուր Շահինյանն ու Մաքսիմ Մանուկյանը և 98 կգ քաշային, օլիմպիական խաղերի բրոնզե մեդալակիր, Եվրոպայի եռակի չեմպիոն ու աշխարհի արծաթե մեդալակիր Արթուր Ալեքսանյան:

Հավաքականի գլխավոր մարզիչ, օլիմպիական չեմպիոն Լևոն Ջուլֆալակյանը հայտարարել է, որ այս մրցաշարի արդյունքներով կկազմավորվի այն հավաքականը, որը կմասնակցի սեպտեմբերի 6-14-ը Տաշքենդում կայանալիք աշխարհի առաջնությանը: