ԲՀԿ-ն պատրաստ է ՕԵԿ-ի հետ համագործակցել

Այսօր ԱԺ ԲՀԿ խմբակցությունում տեղի ունեցավ ԲՀԿ-ՕԵԿ հանդիպումը: Օրակարգի հիմնական հարցը, որով ՕԵԿ-ը դիմել էր ԲՀԿ-ին հանդիպման համար, Ընտրական օրենսգրքի բարելավմանն ու 100 տոկոս համամասնական ընտրակարգին անցնելուն էր վերաբերում:

Լրագրողների հետ զրույցում ԲՀԿ խմբակցության քարտուղար Նաիրա Զոհրաբյանը նշեց. «Գաղտնիք չէ, որ դա ԲՀԿ հիմնարար սկզբունքային դրույթներից մեկն է եղել, ինչպես նաև քառյակի` երեկ հրապարակած 12 կետերի մեջ ևս առկա է, այնպես որ` այս հարցում մեր մոտեցումները նույնական են»:

Նրա խոսքով` բոլոր այն հարցերում, որտեղ կտեսնեն համագործակցության եզրեր ՕԵԿ-ի հետ, խմբակցությունը պատրաստ է համագործակցության: Պատգամավորը նաև հիշեցրեց, որ բազմիցս այդ մասին խոսել է նաև ԲՀԿ նախագահ Գագիկ Ծառուկյանը` որ երկիրը կանգնած է այնպիսի լրջագույն մարտահրավերների առջև, որ մեկ կուսակցություն չի կարող այդ խնդիրները կարգավորել, և անհրաժեշտ է հասարակական-քաղաքական համախմբում:

Ինչ վերաբերում է այլ հարցերի քննարկմանը, մասնավորապես` քառյակի ֆորմատում ՕԵԿ-ի ներգրավմանը, Ն.Զոհրաբյանը տեղեկացրեց, որ նման հարցեր չեն քննարկվել: «Այսօր քննարկել ենք ընդհանուր եզրեր գտնելու դեպքում տարբեր հարցերի շուրջ համագործակցելու հնարավորությունը: Սա նորմալ, աշխատանքային մոտեցում է: Եվ կարծում եմ, որ քառյակն իր աշխատաոճով նոր մշակույթ բերեց կուսակցությունների հարաբերությունների դաշտ, և հենց այսպիսին պետք է լինեն քաղաքական հարաբերությունները՝ կարող ես տարբեր հարցերի վերաբերյալ ունենալ տարբեր տարաձայնություններ, բայց որտեղ կան տեսանելի ընդհանրություններ, շատ ավելի լավ է միասնական դիրքորոշումներով հանդես գալ»,- հավելեց մեր զրուցակիցը:

Նշենք, որ ՕԵԿ-ն արդեն հանդիպել է «Ժառանգության» հետ, պայմանավորվածություն կա ՀԱԿ-ի և ՀՅԴ-ի հետ, կհանդիպեն նաեւ ՀՀԿ-ի հետ: