Հավաքված փողը չի ծախսվել. բյուջեում հանելուկ է հայտնաբերվել

ԱԺ այսօրվա նիստում, երբ քննարկվում էր 2013թ. պետական բյուջեի կատարման տարեկան հաշվետվությունը, ՀՀ գխավոր գանձապետ Ատոմ Ջանջուղազյանին հարց ուղղեց ԱԺ ՀԱԿ խմբակցության ղեկավար Լևոն Զուրաբյանը: Նա խնդրեց բացատրել այն տարօրինակ հանելուկը, այն ռեբուսը, որի պատասխանն ինքը չի գտնում: Նա նշեց, որ գտնվել է 189 միլիարդ դրամ, մինչդեռ` բյուջեի ծախսային մասը թերակատարվել է: Եվ տարօրինակ է այն, որ կառավարությունները չեն կարողանում բյուջեի եկամտային մասն ապահովել, բայց մտնում են ծախսերի մեջ: «Իրականում հավաքել եք փողը ավելին, քան պլանավորված էր, բայց չեք ծախսել, և չծախսելը հիմնավորված չէ: Ինչո՞ւ այդ ծասխերը չեն կատարվել, եթե կառավարությունն այդ գումարն ունեցել է»,- հարցրեց Լևոն Զուրաբյանը:

Ջանջուղազյանը պատասխանեց, որ պետք է առանձին-առանձին դիտարկել դեպքերը, թե ինչո՞ւ ծախսերը չեն կատարվել, իսկ դիտարկումները տեղի են ունեցել ԱԺ հանձնաժողովներում, որտեղ էլ պատասխանատուները մանրամասն ներկայացրել են հաշվետվություն:

«Նույնիսկ Խորհրդային միության ժամանակ, երբ պլանային տնտեսություն էր, հնարավոր չէր ամբողջությամբ կանխատեսել հարյուր տոկոս կատարողական»,- ասաց ՀՀ գլխավոր գանձապետը: