Լևոն Զուրաբյանը շնորհավորեց բոլորին քառյակի համաձայնագրի ստորագրման կապակցությամբ

Այսօր լրագրողների հետ հանդիպման ժամանակ ԱԺ ՀԱԿ խմբակցության ղեկավար Լևոն Զուրաբյանը, խոսելով քառյակի 12 կետանոց պահանջների մասին, նշեց, որ քառյակն իրականացրել է բարդ ու դժվարին աշխատանք:

Խնդիրն այն է, որ այդ չորս ուժերը քաղաքագիտական, գաղափարախոսական, մեթոդաբանական հարթություններում ունեն տարբեր կարծիքներ, մի մասն ավելի արմատական, հեղափոխական փոփոխությունների կողմնակից է, մյուս մասն` ավելի շրջահայաց, դանդաղ ընթացքի կողմնակից: «Սակայն բոլորիս միավորում է այն միտքը, որ երկիրը կործանվում է, վտանգված է մեր երկրի ու ԼՂ անվտանգությունը: Ժողովուրդը չունի վստահություն պետական ինստիտուտների նկատմամբ: Աղետալի արտագաղթ կա, համակարգային կոռուպցիա և անարդարություն, և նման վիճակում պետք է գործել ու միավորվել»,- ասաց Լևոն Զուրաբյանը:

Նրա խոսքով` չորս ուժերը ձևավորել են նոր միասնական օրակարգ, որովհետև նախորդ օրակարգը չիրականացավ` հրաժարական տվեց հին կառավարությունը: «Կոնգրեսը համոզված է, որ երկրի գլխավոր չարիքը Սերժ Սարգսյանի ռեժիմն է, և անհրաժեշտ է երկրում արդար ու ազատ իշխանություն ձևավորելը: Բայց հասկանում ենք, որ միասնական օրակարգ պետք է ձևավորել: Ես շնորհավորում եմ մեր ժողովրդին այս համաձայնագրի ստորագրման կապակցությամբ»,- ասաց Լևոն Զուրաբյանը: