Հովիկ Աբրահամյանն, ի վերջո, շնորհավորեց Մարդու իրավունքների միջազգային օրվա կապակցությամբ

Այսօր, կառավարության նախաձեռնությամբ, ԱԺ-ում գումարվեց տարվա վերջին արտահերթ նստաշրջանը: Վարման կարգի վերաբերյալ ՀԱԿ պատգամավոր Նիկոլ Փաշինյանը նշեց, որ այսօր Մարդու իրավունքների միջազգային օրն է և շնորավորեց բոլորին այդ առիթով: «Կարծում եմ` արժե, որ ԱԺ-ն իր անունից շնորհավորի քաղաքացիներին Մարդու իրավունքների օրվա կապակցությամբ»,- ասաց նա:

Ի պատասխան ԱԺ նախագահը նշեց. «Շնորհավորանքները` քվեարկություններից հետո»:

Քվեարկություններից հետո ԱԺ նախագահը, ինչպես խոստացել էր, շնորհավորեց բոլորին Մարդու իրավունքների միջազգային օրվա կապակցությամբ:

Այնուհետեւ Նաիրա Զոհրաբյանը վարման կարգի վերաբերյալ նշեց, որ ԲՀԿ-ն իր տեսակետն արդեն հայտնել է կառավարության կողմից ուրբաթ գիշեր որոշվող ու երկուշաբթի ԱԺ բերվող հապճեպ օրինագծերի վերաբերյալ: Ըստ պատգամավորի`  դա անհարգալից վերաբերմունք է ԱԺ-ի հանդեպ, ահա` ինչու ԲՀԿ-ն չի մասնակցելու քվեարկությանը:

Քվեարկության դրվեց «Կուտակային կենսաթոշակների մասին» ՀՀ օրենքում լրացումներ կատարելու նախագիծն առաջին ընթերցմամբ ընդունելու մասին որոշումը. կողմ քվեարկեց 70, դեմ՝ 39, ձեռնպահ՝ 2 պատգամավոր: