ԵՏՄ-ի մասին պայմանագիրը հաշվի է առնում բոլոր անդամների շահերը. Նազարբաև

Աստանայում մեկնարկել է Եվրասիական տնտեսական միության Բարձրագույն խորհրդի նիստը: 

Ղազախստանի նախագահ Նուրսուլթան Նազարբաևը ելույթում նշել է, որ Եվրասիական տնտեսական միության մասին պայմանագիրը հաշվի է առնում բոլոր անդամ երկրների շահերը:

«Կարծում եմ՝ պայմանագիրը գրագետ է ստացվել և հաշվի է առնում բոլոր երկրների շահերը: Մեծ աշխատանք է տարվել և ձեռք բերված կոնսենսուսը բավարարել  է բոլոր կողմերին»,- ասել է նա:

Նազարբաևը նշել է, որ պայմանագիրը հիմնված է պետությունների ինքնիշխան հավասարության, տարածքային ամբողջականության, ինչպես նաև երկրների քաղաքական կառուցվածքի հանդեպ փոխհարգանքի սկզբունքների վրա:

Նշենք, որ ներկայումս նեղ կազմով նիստ է ընթանում՝ Ռուսաստանի, Ղազախստանի  և Բելառուսի ղեկավարների մասնակցությամբ: Նիստի ավարտից հետո կմեկնարկի ընդլայնված ձևաչափը՝ Հայաստանի և Ղրղզստանի նախագահների մասնակցությամբ: