Եթե Վանաձորի տեխնոպարկի ծրագիրն էլ փակվի, Էդմոն Մարուքյանը կհիասթափվի նոր կառավարությունից

Անկախ պատգամավոր Էդմոն Մարուքյանի համար անսպասելի էր լսել, որ կառավարությունը մտադիր է սկսել «Գյումրու տեխնոպարկ» ՓԲԸ-ի լուծարման պրոցեսը: Yerkir.am-ի հետ զրույցում նա հույս հայտնեց, որ Վանաձորի` նոր ստեղծվող տեխնոպարկը, որն արդեն ընթացքի մեջ է, չի արժանանա Գյումրու տեխնոպարկի ճակատագրին:

Պատգամավորը նշեց, որ Վանաձորի տեխնոպարկի ծրագիրն ընդունվել է Տիգրան Սարգսյանի գլխավորած կառավարությունը, գումարներ են դուրս գրվել` այդ ծրագիրը կյանքի կոչելու համար, Ճարտարագիտական համալսարանի Վանաձորի մասնաճյուղի հիման վրա պետք է ծրագիրը կյանքի կոչվեր, արդեն շենք էր առանձնացվել, որը պետք է հատկացվեր տեխնոպարկին:

«Ես հույս ունեմ, որ Վանաձորի տեխնոպարկը կմնա: Դե հիմա` Գյումրու փորձը գուցե անհաջող է եղել, կամ չեն կարողացել Գյումրիում իրականացնել այդ ծրագիրը: Բայց եթե Վանաձորի տեխնոպարկի ծրագիրն էլ փակվի, ես խորը հիսաթափություն կապրեմ նոր կառավարությունից»,- ասաց Էդմոն Մարուքյանը: