ՀՀԿ-ական պատգամավորը համոզված է, որ վարչապետի ներմուծման կարիք չկա

ԱԺ ՀՀԿ խմբակցության պատգամավոր Համլետ Հարությունյանի համար վարչապետ Տիգրան Սարգսյանի հրաժարականը անսպասելի է եղել: Yerkir.am-ի հետ զրույցում նա նշեց, որ հրաժարականի դրդապատճառների մասին տեղյակ չէ, սակայն փաստն այն է, որ վարչապետը ինքն է գրել հրաժարականի դիմումը:

Ըստ Համլետ Հարությունյանի` կառավարության հրաժարականը ենթադրում է տնտեսական կուրսի փոփոխություն: «Հույս ունեմ, որ նոր վարչապետի քաղաքականությունը դրական փոփոխություններ կբերի, ուզում եք` էդ հույսն էլ չունենա՞նք: Հույսը չի մեռնում, իհարկե, հույս ունեմ»,- ասաց նա` հավելելով, որ ինքն իր համար ունի վարչապետի նախընտրելի թեկնածու, որի անունը, սակայն, իրավունք չի վերապահում իրեն բարձրաձայնելու: Պատգամավորը համարում է, որ ՀՀԿ-ում կան շատ լավ մասնագետներ, որոնք կարող են հավակնել վարչապետի պաշտոնին:

«Իմ խորին համոզմամբ` վարչապետի ներմուծում պետք չէ` որ ոչ Հանրապետական կուսակցությունից լինի, որովհետև Հանրապետական կուսակցությունը, որպես հաղթող քաղաքական ուժ, կարող է իր մեջ գտնել լավ թեկնածուներ»,- ասաց նա:

Հարցին` հնարավո՞ր է, որ նոր վարչապետը Արցախից լինի, Համլետ Հարությունյանը պատասխանեց. «Չեմ կարող ասել, և հետո ես այդ տեղային բաներին տուրք չեմ տալիս»: