Գալուստ Սահակյանը բացատրեց, թե ինչու ՄԱԿ-ում ձեռնպահ չքվեարկեցինք

ԱԺ ՀՀԿ խմբակցության ղեկավար Գալուստ Սահակյանի համոզմամբ՝ Հայաստանը շատ տրամաբանական ու ճիշտ քվեարկություն է արել ՄԱԿ-ում:

Լրագրողների հետ ճեպազրույցում նա նշեց, որ Հայաստանը պաշտպանում է ազգերի ինքնորոշման իրավունքը, որը Հայաստանի համար նաև արժեքային համակարգ է, ահա` ինչու բնական է, որ պետք է դեմ քվեարկեին բանաձեւին: «Ես չգիտեմ` մյուս երկրները ինչի համար են պայքարում, բայց մեր երկրի համար դա կարևորագույն արժեքներից մեկն է»,- ասաց Գալուստ Սահակյանը:

Հարցին` հնարավո՞ր է, որ Հայաստանի վրա ճնշում գործադրած լինեին, Գալուստ Սահակյանը պատասխանեց. «Այսինքն` եթե չճնշեին, մենք պետք է դե՞մ քվեարկեինք ազգերի ինքնորոշման իրավունքին: Իսկ ձեռնպահ քվեարկելը կնշանակեր, որ մենք քննարկելի ենք դարձնում ազգերի ինքնորոշման իրավունքը: Իհարկե, այդ քվեարկությունը Հայաստանի շահերից էր բխում: Կարծում եմ` այդ առումով գերտերությունները մեզ հասկանում են: Ժամանակները ցույց տվեցին, որ մեր տեսակետները ըմբռնելի են բոլորի համար, և որ մեր քաղաքականությունը ճիշտ է»: