Շատ կուզեի, որ «Դեմ եմ»-ի մասնակիցներին դարձնեինք «կողմ». Վահրամ Ավանեսյան

Եթե իսկապես հնարավոր է որեւէ նախաձեռնություն ունենալ, որով հնարավոր է`  «Դեմ եմ» շարժումը «կողմ» լինի, ապա ես կարող եմ պնդել, որ, այո', դրա համար ենք անում. այսօր նշեց էկոնոմիկայի նախարար Վահրամ Ավանեսյանը` անդրադառնալով ՏՏ ոլորտի սկսնակ ձեռնարկություններին հարկային արտոնություններ ու պետական աջակցություն տրամադրելուն ուղղված` «Տեղեկատվական տեխնոլոգիաների ոլորտին պետական աջակցության մասին» նոր օրինագծի կապակցությամբ դիտարկմանը, թե դա արվում է «Դեմ եմ» շարժման մասնակիցների կրելիք ֆինանսական կորուստները այս ձեւով փոխատուցելու ու նրանց «կողմ» դարձնելու համար:

«Որովհետեւ ես չեմ տեսնում պատճառը, թե ինչո՞ւ պետք է կառավարությունը կամ մի որեւէ ուժ չիրականացնի մի գործողություն, որով հանկարծ կստացվի այնպես, թե մենք կատարեցինք ինչ-որ մի քայլ, ու այդ քայլի պատճառով նրանք, ովքեր դեմ էին, դարձան կողմ»,- ասաց Վահրամ Ավանեսյանը:

Նախարարը նշեց, որ եթե ավելի լայն տեսանկյունով նայենք հարցին, ապա ինքը չի կարծում, թե  այստեղ լինելու է այդ  հնարավորությունը, որ ՏՏ ոլորտի այսօրվա աշխատողները, ովքեր բարձր աշխատավարձեր ունեն ու աշխատում են տարբեր ընկերություններում, միանգամից սկսելու են իրենց ընկերությունները ստեղծել:

«Շատ կուզեի, որ «Դեմ եմ» շարժման մասնակիցներին դարձնենք «կողմ», բայց չեմ կարծում, որ սա այդ գործիքն է լինելու»,- եզրափակեց Վահրամ Ավանեսյանը: