ՀՀԿ շենքի մոտ բողոքող քաղաքացիներին մոտեցան Գագիկ Բեգլարյանն ու Տարոն Մարգարյանը

Այսօր ՀՀԿ ԳՄ նիստից առաջ ՀՀԿ շենքի մոտ էին հավաքվել կառավարության դեմ բողոքող` Հանրապետության նրբանցքի մի խումբ բնակիչներ, որոնց տները օտարվել են տարիներ առաջ, և նրանց բնակարանների հարցը դեռևս չի լուծվել:

Բնակիչները Yerkir.am-ի հետ զրույցում նշում էին, որ այլևս չեն հավատում որևէ մեկի խոստումներին: Նրանք նշում էին, որ պատրաստ են ծայրահեղ քայլերի` կա'մ ճանապարհները կփակեն, կա'մ կմտնեն ՀՀԿ-ի գրասենյակ և դուրս չեն գա այդտեղից:

Նշենք, որ բողոքող բնակիչներին մոտեցան Երևանի նախկին քաղաքապետ, ՀՀ տրանսպորտի և կապի նախարար Գագիկ Բեգլարյանը և ներկայիս քաղաքապետ Տարոն Մարգարյանը: Վերջինս բնակիչներին հավաստիացրեց, որ  խնդիրը գտնվում է կառավարության ուշադրության կենտրոնում, և որ աշխատանքները շարունակվում են, իսկ քաղաքապետարանն իր  լիազորությունների սահմաններում աշխատանքներն ավարտել է, ուստի մնացած հարցերի դեպքում թող դիմեն վարչապետին: