Ինչ հետեւանք կունենա ռուսական ռուբլու արժեզրկումը Հայաստանի համար

Հայաստանի վրա առաջին հերթին ռուսական ռուբլու արժեզրկումը չի անդրադառնա, կառավարությունն այս առումով եւս սխալ մեկնաբանություն էր արել: Կանդրադառնա այն, որ մեր բանկերում մոտ 1,5 միլիարդ դոլար արեւմտյան փող կա: Եվ եթե այդ փողի արտահոսք սկսվի, վարկերը կթանկանան, տնտեսության` առանց այդ էլ շատ ցածր աճի տեմպերը կդառնան 0 կամ մինուս, իրականում դրանք մինուս են եղել, ուղղակի խաբել են վիճակագրությամբ. լրագրողներին այսօր հայտնեց ԱԺ պատգամավոր, նախկին վարչապետ Հրանտ Բագրատյանը:

«Սրանից հետո միայն ռուսական ռուբլու արժեզրկումը կարող է անդրադառնալ հայկական տնտեսության վրա»,- նշեց բանախոսն ու շարունակեց, թե այդ արժեզրկումը, իհարկե, Հայաստանում կհանգեցնի որոշակի գնաճի:

«Ռուբլու արժեզրկումը նշանակում է որոշակի գնաճ Ռուսաստանում, դա շատ մեծ ազդեցություն չի ունենա, որովհետեւ էներգակիրների ներկրման պայմանագրերը, հիմնականում` ռուսների հետ, կնքված են արտարժույթով` դոլարով, բայց ուրիշ բան տեղի կունենա. մենք ահագին էքսպորտ ունենք Ռուսաստանում` շուրջ 300 միլիոն դոլարի, այնտեղ բարձր գնաճի պայմաններում այդ էքսպորտը կկրճատվի: Այդ ձեւով կանդրադառնա: Կանդրադառնա նաեւ նրանով, որ Ռուսաստանից, բացի էներգակիրներից, բերում ենք նաեւ այլ ապրանքներ` ոչ մեծ քանակությամբ, այնուամենայնիվ, այդ ապրանքներն, ամենայն հավանականությամբ, կթանկանան»,- իր դիտարկումները ներկայացրեց նախկին վարչապետը:

Բայց այստեղ  Բագրատյանը տեսնում է «ոչ թե ռեւոլյուցիոն, այլ էվոլյուցիոն» վատացում: Որովհետեւ Ռուսաստանի բանկն այսօրվա դրությամբ ունի 490 միլիարդ դոլարի պահուստ, այսինքն` անպայման ինտերվենցիա կանի եւ արդեն անում է: Դա ռուսներն ուզում են ի շահ Ռուսաստանի տնտեսության օգտագործել` ռուբլու մի թեթեւ արժեզրկումը, որը թույլ կտա ավելացնել ռուսական էքսպորտը: Խոսքն, իհարկե, գազի ու նավթի էքսպորտի մասին չէ, որոնք դոլարով են:

«Այսինքն` ես այդտեղ ռեւոլյուցիոն վատացում չեմ տեսնում, այլ էվոլյուցիոն վատացում Հայաստանի տնտեսության վրա կարող է լինել, եթե հանկարծ արտասահմանյան շահառուները սկսեն բանկերից մասսայաբար փողերը հանել»,- եզրափակեց Հրանտ Բագրատյանը: