Էդ միլիարդները, որ դուրս եկան Հայաստանից, էլ երկիր չեն մտնի. Սուրեն Թադևոսյան

Բոլորի ներգրավվելը որևէ քաղաքացիական խնդրի լուծմանն ուղղված պայքարում հաստատ օգնում է, դրա ապացույցը տրանսպորտի թանկացման դեմ պայքարն էր: Այդ մասին լրագրողների հետ զրույցում ասաց ռեժիսոր Սուրեն Թադևոսյանը՝ խոսելով «Դեմ եմ պարտադիրին» շարժմանը մասնակցելու մասին:

Նա նշեց, որ 100 տոկոսով դեմ է այդ օրենքին: «Ես տնտեսագետ եմ մասնագիտությամբ, ու պարտադիր կուտակայինի օրենքի հետ կապված` կան դրույթներ, որոնք ծիծաղելի են: 45 տարի մարդ պետք է վճարի, որ հետո թոշակ ստանա, աշխարհում չկա նման ժամանակահատված, մաքսիմում 30 տարի է: Օրենքը թերի է: Ինչի՞ համար են այդ ահռելի գումարները հավաքում ու տանում դուրս, իբրև թե ինչ-որ ընկերություններ հետո երկրին օգո՞ւտ կբերեն: Էդ միլիարդները, որ դուրս եկան Հայաստանից, էլ երկիր չեն մտնի, ես չեմ հավատում, այ տենց անհավատ մարդ եմ»,- ասաց նա:

Սուրեն Թադևոսյանը նշեց, որ հիացած է հունվարի 18-ի հանրահավաքում հավաքված մարդկանցով: «Ես հանրահավաքի ժամանակ տեսել եմ այնպիսի մարդկանց, որոնց երբեք չէի տեսնի, դա լրիվ այլ մակարդակի կոնտինգենտ էր, ես դրա համար ուղղակի հիացած էի: Դա արդեն նշանակում է, որ շարժումը թափ է առել»,- ասաց նա:

Ինչ վերաբերում է հանրահավաքին չորս քաղաքական խմբակցությունների պատգամավորների մասնակցությանը, նա կարծիք հայտնեց, որ դրանում պետք չէ վատ բան տեսնել, քանի որ նույն այդ պատգամավորը նույնպես մտահոգված է երկրի խնդիրներով: Ըստ Սուրեն Թադևոսյանի` նրանց մեջ կան մարդիկ, որոնք, որպես մարդ, ոսկի մարդ են, ու եթե նա գալիս մասնակցում է հանրահավաքին, դա շատ լավ է: