Հեչ որ չէ, նախագահը կարող է հրաժարական տալ կամ ինքնասպան լինել

ԱԺ արտահերթ նիստում ԱԺ «Ժառանգություն» խմբակցության ղեկավար Զարուհի Փոստանջյանն իր ելույթում կարծիք հայտնեց, որ երբ տասնյակ տարիներ առաջ Հայաստանը բոլշևիկացվում էր, հավանաբար, այն ժամանակ էլ նման ելույթներ էի հնչում: Հիմա էլ Հայաստանն ընտրել է «մաքսայնացումը», ահա ինչու ստիպված է նման համաձայնագրեր ստորագրել:

«Մենք այսօր մեր հողը տալիս ենք պուտինյան Ռուսաստանին: Ասում ենք` կառավարությունը լավ չի բանակցել, բայց ովքե՞ր են կառավարությունում, ինչի՞, նրանք բանակցել գիտե՞ն: Այս ամենի մեղավորը Սերժ Սարգսյանն է, իսկ ո՞վ է նա, մեր թշնամու` Գևորգովի օգնականը Ստեփանակերտում: Ես մտածում եմ` ո՞նց կարող է հայ մարդը նման համաձայնագրեր ստորագրել" Հեչ որ չէ, հրաժարական կտա կամ ինքնասպան կլինի, բայց ես տեսնում եմ, որ իշխանությունները «ժուչոկ» են եղել, որ նման համաձայնագիր են ներկայացրել»,- ասաց Զարուհի Փոստանջյանը:

Նա նշեց, որ ներկա պահին կարելի է ասել, որ Հայաստանն արյունահոսում է, ուստի պետք է ԱԺ հրավիրել Սերժ Սարգսյանին ու պահանջել դադարեցնել այդ ամենը: «Եկեք, մի ճանապարհ գտնենք, նրանից հրաժարվենք ու մեր ինքնիշխանությունը չկորցնենք: Դուք գիտեք ի՞նչ է նշանակում օտարի լծի տակ ապրելը: Մենք զրկված ենք լինելու զարգանալու հնարավորությունից: Ճիշտ ասաց Պուտինը, որ այստեղից երբեք էլ չի գնացել, այո', չի գնացել ու թույլ էլ չի տալու, որ մենք զարգանանք»,- ասաց պատգամավորը:

Նա համարում է, որ անգամ հիմա Հայաստանն ունի այլընտրանքային ուղիներ` գազ ներկրելու հարցում, որովհետև Իրանի պաշտոնյաները հայտարարեցին, որ Հայաստանը իրենց հետ չի բանակցել: Կա նաև Վրաստանի հետ բանակցելու տարբերակը:

Պատգամավորը հայտարարեց, որ ո'չ ԵՄ-ն, ո'չ Ռուսաստանը Հայաստանի ռազմավարական գործընկերը չեն: «Պուտինը չորս միլիարդ դոլարի զենք է վաճառել Ադրբեջանին, բա եթե մեր ռազմավարական գործընկերն է, ուրեմն ո՞նց է նման ծավալի զենք վաճառել Ադրբեջանին: Եկեք, մի ճանապարհ գտնենք ու դուրս գանք այս վիճակից: Տարիներ հետո չեն ասելու Հանրապետականն է մեղավոր, ասելու են`  դուք բոլորդ եք մեղավոր»,- ասաց Զարուհի Փոստանջյանը և, դառնալով ՀՀ էներգետիկայի նախարար Արմեն Մովսիսյանին, ասաց. «Ես խնդրում եմ Ձեզ, հետ տարեք այս համաձայնագրերը, Դուք մեզ զրկում եք զարգացումից: Գնացեք, համոզեք Սերժ Սարգսյանին, որ հրաժարական տա, կամ միգուցե կոչում տանք նրան, չգիտեմ, բայց այսպես չի կարող շարունակվել»: